Nipilersornikkut pilersitaq kalaallit oqaluttuaannik isumassarsiorfigineqartoq
Nipilersornikkut pilersitaq alutornarluinnartoq kalaallit oqaluttuaannik aammalu pinngortitamik avatangiisaaannit assigiinngitsuninngaanniit isumassarsiorfigineqarpoq, taannalu erinniortumit Jakob Buchananimit ima nassuiarneqarpoq.
-Helge Nordbakken nipilersortartuusoq suleqatigaara, Nuummukaqatigalugulu, tassani utoqqaat nipaannik isiginnaartitsisartunngorniallu ilinniarfianni nipinik immiussilluta, Jakob Buchanan taamak oqarpoq.
AAMMA ATUARUK Oqaluttuatoqqat tunisaalluartut
Jakobip suleqatinilu nunatsinni nipit immiussimasatik tusarnaartitsinerminni atorniarpaat.
-Oqaatsinik arfineq pingasunik oqartut immiuteqattaarpavut. Taava immiussavut assigiinngitsut, tassa nipit, assit filmillu tusarnaartitsinitsinni saqqummiussanut ilaassapput, Jakob oqarpoq.
Erinarsoqatigiit nunatsinni Danmarkimilu ilisimaneqarluartut, Aavaat, peqataasussanut ilaapput.
-Saaffigimmanga peqataasinnaassasoraluta, nangaasuunngiivillunga peqatigiiffitta aqutsisuinut kaajallagukkakku tassa akuerineqarpoq, soormita allanik aamma misiliilaarutta qanormita issava, erinarsoqatigiit Aavaat siulittaasuat, Pavia Høegh, taamak oqarpoq.
AAMMA ATUARUK Aavaat Nuugaatsiarmiunut misiginneqataasut
Erinarsortartut erinarsoqatigiissuillu aamma nipilersoqatigiit assigiinngitsut peqatiginissaat Aavaamut nutaajuvoq.
-Assut pissanganarpoq. Immikkuullarikkami uagut ulluinnarni tamakku peqataaffigineq ajoratsigit, aamma takussaasoqarpiarneq ajorami kalaallinik taamak ittunik. Pissangalluta utaqqivarput taanna ullussaq, Paavia oqarpoq.
Erinarsoqatigiissuit nipilersoqatigiillu naalagaaffiup atuagaateqarfissuata ilaani, Den Sorte Diamantimi, Københavnimiittumi februarip ulluisa 22-ni tusarnaartitsissapput.