Nipilersornernik aaqqissuussinissat taamaatiinnarpaat

Ajunaartut aqqunartiterneqartullu nipilersorfiusussamut apuunniartillutik sulluliakkoorniarnerminni inoqarpallaarnera pissutigalugu kiggigunneqarnertik tummaatarineqarnertillu toqqutigaat. Ajoquserneqartut ilarpassui inuunerminnik aarlerinartorsiorput, ajunaartullu amerlanerulernissaat ernummatigineqarluni.

Tusarnaariartorpassuit annerusumik uivertorsuanngornissaat ernummatigalugu, aaqqissuisut nipilersornissarsuaq ippassaq matunngilaat.

Ippassaq nipilersorfiusumit Jakob Kanne Bjerregaard ima pasissutissiivoq:

- Tusarnaariarpassuit maanna angerlakaareersimalerput. Inuit maanna maaniittut aaqqissuussisut oqartussallu pakatsissutigeqaat. Taakku oqaatigaat aaqqissuisut tusarnaariat isumannaatsumiinnissaat pinnagu aningaasarsiornissartik kisiat eqqarsaatigisimagaat.

Qularutissaanngitsumik inuit amerlavallaat tusarnaartitsivissamut ataatsikkut iserniarsarisimapput.

Kisitsisit taaneqartut ilagaat illoqannginnersami inunnut 350.000-inut inissalimmi inuit 500.000-iusimasut. Aammattaarli oqaatigineqarluni uivernersuup nalaani tusarnaartitsivissamut iserniarsarisut millionit aappaata affaanik amerlassuseqarsimasut.

Ippassaq peqataasut ilaasa oqaloqatigisama aaqqissuisut oqartussallu pakatsissutigalugillu kamaatigeqaat. Inuit taama amerlatigisut ataatsikkut sulluliakkoortillugit isaatinniarneqarsimanerat paasiuminaatsippaat. Sulluliap isaaffigineqartussap eqqaaniittoq aqqusineq kapinartulersukkanik assiaqutsersorneqarsimavoq, inuit qimarngussornissaannut periarfissaarullugu. Aaqqissuussinerlumi sioqqullugu tamaani ajutoortoqarsinnaanissaa ernummatigalugu isornartorsiorneqarsimavoq.

Ukiormanna tusarnaartitsinerit taamaattut arlallit ingerlanneqartuassaagaluarput, ippassarli pisut patsisigalugit taamaatiinnarneqartut oqaatigineqarpoq.