Nipilersoqatigiit tusarsaavallaanngitsut appissapput

Københavnimi nipilersortarfimmi Globalimi aqagu tusarnaartitsinissamut ussassaarut taama nipaqarpoq. Nipilersortartut Aarhusimeersut marluk, Inuit Feet aamma Small Time Giants, tassani tusarnaartitsissapput.

Small Time Giantsikkunni inuttaapput Anda Hendriksen, Jakob Skovaa, Miki Jensen aamma Pilutannguaq Hammeken. Taakku Qaqortormiuupput, Aarhusimili maanna najugaqarallarlutik. Nipilersoriaaseq indierockiuvoq, kalaallit kulturiannit silarsuarmilu nipilersoriaatsimit pinngortuulluni. Nipilersortartut taakku taaguutertik Small Time Giants toqqarsimavaat, inuit mikisunnguit allaat alliartortarmata. Facebookikkut quppernerminni taama nassiaapput.

Inuit Feetsikkunni erinarsortoq, Jørgen Kristian Mikkelsen, nipilersoqatigiinni kisiartaalluni kalaaliuvoq - Nanortalimmiuuvorlu. Inuit Feet rockimik nipilersortarput, asanninneq fisternerlu pillugit qallunaatut kalaallisullu erinarsortarlugit.

85-it aqagu tusarnaariarniarlutik Facebookikkut nalunaareerput.

Nipilersortartut taakku marluk tulleriiginnarnik marlunnik qaammatip tulliani tusarnaartitseqqissapput. Aalborgimi Kalaallit Illuutaanni tamanna pissaaq.