Nipilersoqatigiit Sume pillugit piviusulersaarut Danmarkimi takutinneqartussanngorpoq
Filmiliortut marluusut, Inuk Silis Høegh aamma Emilé Hertling Peronard, piviusulersaarusiartik nunatsinni illoqarfinni arlalinni ulluni aqqaneq-marlunni angallateqqammerpaat, maannalu tassa Danmarkimi takutittussanngorlugu.
Illoqarfiilli pingaarnersaanni Københavnimi takutinneqarnissaa novembarip arfernata tungaanut utaqqineqartariaqassaaq, piviusulersaarummi filminik piviusulersaarutinik festivalertitsoqarnerani Copenhagen Doximi takutinneqartussaavoq.
Illoqarfinni Odensemi, Aalborgimi, Aarhusimi, Esbjergimi, Koldingimi, Roskildemi Ishøjimilu piviusulersaarut filmertarfinni assigiinngitsuni, tulliani sisamanngorpamit sapaatit-akunnerini aggersuni takutinneqassaaq.
Isissutissanik tuniniaaneq aallartereerpoq, filmiliortullu marluusut filminik nuannarisallit aammalu Kalaallit Nunaannik soqutigisaqartut piviusulersaarutip illoqarfimminni takutinneqarnissaa pillugu najukkaminni filmertarfimmut saaffiginneqqullugit kajumissaarpaat.
Filmertarfinni sorlerni qaqugulu takutinneqassanersoq allattorsimaffimmi ataaniittumi atuarneqarsinnaavoq:
- ODENSE, Det Nordatlantiske Hus, oktobarip 16-ianit (ilitsersuisoq Inuk Silis Høegh aamma kreativ producer Emile Hertling Péronard najuutissapput)
- AALBORG, Biffen, oktobarip 16-ianit
- AARHUS, Øst for Paradis, oktobarip 16-ianit
- ESBJERG, Huset, oktobarip 16-ianit
- KOLDING, Nicolai Bio, oktobarip 18-ianit
- ROSKILDE, Studenterhuset, oktobarip 20-anit
- ISHØJ, Ishøj Bio, oktobarip 23-anit
- KØBENHAVN, CPH:DOX, novembarip arfernanit 16-ianut
