Nipilersoqatigiit Nuummi naapisimaarput
Ullaarnganiit Nuuk Byorkester aamma Tamburkorpset aqqusinermi appisimaassapput. Ingerlaaqatigiinnermi peqataassapput illoqarfimmilu sumiiffinni assigiinngitsuni appisimaassapput. Sapaatiuppat nipilersoqatigiit naapisimaarnerat naammassissaaq Katuami tusarnaartitsinikkut tassanilu nipilersortartut erinarsortartullu 65-it peqataaniarput.
- Nipilersoqatigiinnut ilinniarfiup nipilersoqatigiit Kommuneqarfik Sermersuumi katersuunnerat aaqqissorpaa assorsuarlu nuannaarutigaarput maanna Tasiilamiit peqataasoqarmat. Aamma nipilersoqatigiinnut ilinniarfimmi ilinniartuusimasut arlallit tikeraartoriniarpavut taakkulu Danmarkimi maanna ingerlalluarput. Jens Nielsen nipilersoqatigiinnut ilinniarfimmi aamma Tamburkorpsimi aallartittoq ullumikkut inuussutissarsiutigalugu anaalertarissanik nipilersortartuuvoq aammalu siornatigut Tamburkorpsimi siutooq Stina Hætte Nielsen Odsherred Gardenimi ingerlalluarpoq. Taakku uani sapaatip akunnerani Nuummi ilinniartitsipåput, nipilersoqatigiit katersuunneranni ataqatigiissaarisoq Arnannguaq Gerstrøm nipilersoqatigiit ilinniarfianni ulluinnarni aqutsisoq oqarpoq.
Ilitsersuisullu pikkorissut nipilersoqatigiit katerisimaarneranni ilinniartitsisuupput.
Per jensen Det Kongelige Kapelimi anaalertarissanik nipilersortartuuvoq trompetertartorlu Det Kongelige Kapelimut attaveqartoq Bente Errebo Nielsen aamma peqataalluni. Taassuma saniatigut trompetertuuvoq pingajoraallu trombonemik qarlortallaqqissoq Lars Hastrup.
- Neriuutigaarput peqataasut ataatsimoortutut misigitissinnaallugit, aamma kommuneqatigiikkaluarluta Nuuk Tasiilarlu assigiinngissuteqartorujussuupput. Maanna naapisimaarnikkut inuusuttoqatit ulluinnarni atugaat paasisaqarfigineqarsinnaapput nipilersornikkullu ikinngutigiinnerit aallartittarlutik. Siunissaq eqqarsaatigalugu neriuutigaara kommuunitsinni illoqarfimmi allami nipilersoqatigiit naapinnerat ukiut arlaanni pisinnaassasoq, isorartoorujussuummalli assersuutigalugu Nuummiit Tasiilamut inuppassuit angalatinniarnerat akikitsuinnaanngilaq. Nipilersoqatigiit naapisimaarnerat aningaasaateqarfiit aningaasaliinerisigut piviusunngorpoq taakkulu ikiuunnerat assut qujamasuutigaarput, Arnannguaq Gerstrøm oqarpoq, nipilersoqatigiinni siulersortaanermi saniatigut sanimoortarissamik qarlortallammaasoq.
