Nipilersoqatigiit Nanook aasaru ulapputissaqaat
Canadamimi naggueqatigiimmi Inuit Nanookikkut tusarnaartitsisut siullerpaamik Iqalunni sapaatip-akunnerata tulliup ingerlanerani tusanaarsinnaassavaat, Alianait Arts Festivalimi juunip ulluisa 26-annit juulip aallaqqaataata tungaanut peqataassapput.
Nanookikkut festivalertoqarnerani marloriarlutik tusarnaartitsissapput, Iqalunnilu Nunavummilumi nipilersortartunut taassuma saniatigut workshopertitsissallutik.
- Nammineq oqaaserisat aallaavigalugit taalliortarnissap pingaaruteqassusaa tassani ilaatigut oqaluttuariniarparput, Christian Elsener Nanookimeersoq Radioaviisimut oqarpoq.
Nipilersoqatigiit festivalertoqarnerani peqataasut erinnamik ataatsimoorullugu atugassaminnik erinniussapput, festivalip naggataarnersiorneqarnerani taanna atorneqassalluni.
Norgep avannaanukassapput
Nanookikkut Nunavummeereerunik kingorna taava Norgep avannaanukassapput, Riddu Riddu Festivalimi juulip ulluisa qulinganni tusarnaartitsissallutik.
Nanookikkut Saamit Norgep avannaani kulturikkut pikialaartitsineranni kingullermik 2010-mi peqataapput. Indianerit ukioq manna ilaatigut tusarnaartitseqatigissavaat, Six Nations of the Grand River, Canadameersut, Yothu Yindi, Australiami nunap inoqqaavini nipiilersoqatigiit nuannarineqarnerpaat tusarnaartitseqatigissallugit.
Inuk Silis-Høeghip Sumékkut pillugit filmiliaa Riddu Riddu Festivalertoqarnerani marloriarlugu aamma takutinneqarumaarpoq.
Nanookikkut aasaq manna tusarnaartitseqattaarnerat Sjællandip avannaani Himmelstorm Festivalimi tusarnaartitsinermik naggaserneqassaaq, nipilersoqatigiit Savalimmiuneersut Teitur peqatigalugit juulip ulluisa 25-anni tusarnaartitsissallutik.
