Nipilersoqatigiit Naneruaq Canadami festivalimut qaaqqusaasut

Nunatsiaq Online taama allaaserisaqarpoq.

Alianait Arts Festival 2017-imik aaqqissuisut peqataasussanik allattorsimaffiugallartumik avammut saqqummiussillattaareerput, taakkunanngalu ilaatigut Nova Scotiameersoq Joel Plaskett, erinarsortartoq Nunavimmeersoq Elisapie Isaac, nipilersoqatigiit Northwest Territoriesineersut Digawolf minnerunngitsumillu nunatsinneersut Naneruaq ilaallutik.

Aamma erinarsortartup Nunavimmeersoq Kelly Fraserip peqataaniarnini nalunaarutigereerpaa. Taassuma Rihannap erinarsugaa saqqummersitap saqqaaniittoq 'Diamonds' Inuktitut nutserlugu atorsimallugu tusaamaneqaatigaa.

Kelly Fraserip immiussamik aappassaanik "Sedna"-mik qulequtaqartumik apriilip ulluisa 24-anni saqqummersitsissaaq.

Inuiaat nipilersuutaannik nipilersortartut Caribiameersut Kobo Town, Torontomeersumik Ottawameersumillu nipilersoqateqartut, aamma ukiormanna peqataassapput.

Erinarsortartoq guitarertartorlu British Columbiameersoq Matthew Daniel Goud, Northcotetut aamma ilisimaneqartoq, festivalimi aamma appisimaassaaq.

Alianait Arts Festival 2017, juunip 30-anit juulip ulluisa pingajuat ilanngullugu ingerlanneqassaaq.