NIPIAA nipilersortitsilerpat peqataasussat arlalissuupput

Aasianni nipilersortartut peqatigiiffiata NIPIAA-p ukioq manna nipilersortitsinissaanut sapaatit akunneri tallimaannanngorput.

Aasiaat timersortarfiani septembarip ulluisa arfernganniit qulingiluaata tungaanut nipilersortoqassaaq, NIPIAA-p rockimik festivalertitsinissaani aaqqissuisoq Peter Olsen Radioavisimut ilisimatitsivoq.

Pisortatigoortumik pilersaarummik saqqummiisoqanngimmat festivaalip unitsinneqarnissaa ernummatigineqaleraluarpoq, Peter Olsenillu uppernarsarpaa ukioq manna festivalernissap aaqqissuunnerata aallartinniapiloorsimanera.

Aasiaat Kommuneani naalakkersuinermik suliaqartut ukiup kingulliup iluani aalassassimaarnerinit pilersaarusiorneq sunnerneqarsimagaluartoq, aningaasaliisartut tusarnaariartartullu festivaalernissaq kissaatigimmassuk nipilersortussat tulleriiarneqarnerat maanna piariilerpoq.

Zikazakkut, Tivolimi ippassaani nipilersortut, Uummannameersut Siissisukkut aamma nipilersortartut nunani allaneersut nipilersussapput.

Italiameersut Ultima Corsa, Islandimeersut PAN Norgemiullu nipilersoqataanissaat aamma anguniarneqarpoq.