"Nipaatsumik assigiinngisitaarneq" nersornaasigassatut apeqquserneqarpoq
Atuakkiorneruna suna? Nunat Avannaamioqatigiit atuakkiorneq pillugu ataatsimiititaliaani apeqqut ukioq manna pisortatigoortumik atuakkiortunik nersornaasiinnginnermi sammineqarpoq. Danskit atuakkianik isornartorsiuisartut arlallit nunatsinnit atuakkiaq nersornaasigassatut innersuunneqartoq ”Nipaatsumik assigiinngisitaarneq” isornartorsiorneqarpoq.
Aviisimi Informationimi atuakkianik innersuussisartup Erik Skyum-Nielsenip nunat avannarliit atuakkiortunik nersornaasiissarneri ukiuni arlaqartuni malinnaaffigisimavaa, ullumilu Informationimi saqqummersumi allaaserisaqarpoq, ”Nipaatsumik assigiinngiisitaarneq” atuakkiatut taaneqarsinnaanngitsoq atuakkiortunillu nersornaasiisussat nersornaasissappassuk tupigissaqigini. Iganermik angalanermillu allaaserisat taamaalillutik siunissami taallianut atuakkianullu unammillersinnaalissasut, Erik Skyum-Nielsen allappoq.
Kalaallit Nunaanni atuakkiartortut peqatigiiffiata atuagaq innersuussimavaa. Tassani siulittaasup, Hans Anthon Lyngep, tunngavilersuinermini allassimavaa atuagaq oqaasertaqarpiarani assitaqarnerusoq nalinginnaasumiillu atuakkiarineqartartunut naleqqiulluni allaanerussuteqartoq. Atuagaq immikkuullarissuugami kulturimik erseqqissaalluartuusoq, Hans Anthon Lynge ilaatigut innersuussinermut tunngavilersorluni allappoq.
Atuakkianik isornartorsiuisartoq Erik Skyum-Nielsen radioavisimut oqarpoq, Hans Anthon Lyngep atuagaq saqqummiulluartaraa, namminerlu atuakkioriaatsimik nalilersuinissani soqutiginerusarlugu. Politikenimi tusagassiortup Karsten Iversenip tamanna isumaqatigaa atuagarlu nuannarigaluarlugu innersuunneqarnera eqqumiigaa.
- Atuagaq assinik saqqummersitanut allanut unammilluarsinnaavoq allatanilli innersuussisoqarnissaa kissaatiginerugaluarpara. Atuagaq torrattorujussuuvoq taanna isornartorsiunngilara innersuussinerliuna isornartorsioriga, Politikenimeersoq Karsten Iversen naggasiivoq.
Nunat avannaamioqatigiit atuakkiortunut nersornaasiuttagaat Oslomi aqagu ullup-qeqqanut pisortatigoortumik nalunaarutigineqassaaq. Nersornaatip aningaasartai 350.000 koruunit oktobarimi novembarimiluunniit Nordisk Råds Sessionimi tunniunneqassapput.
