Nipaallisimanissaq aamma nunatsinni
Kalaallit Nunaata pisortaarfitsigut illuutai tamarmik erfalasumik qiteqqusimatitsapput Asiap kujammut kangimut ilaani ajunaarnersuakkut qimaguttut ataqqiniarlugit, naalakkersuisut siulittaasuat, Hans Enoksen nalunaarpoq.
Europap Siunnersuisoqatigiivi ilaasortanut tamanut kajumissaaruteqarsimapput Asiami ajunaartorpassuit eqqaaniarlugit januaarip ulluisa tallimaanni ataatsikkut eqqaaniaaneqartariaqartoq, nunatsinnilu naalakkersuisut suliniut taanna iluaralugu peqataaffigiumavaat.
Aamma Danmarkip, danskilli naalakkersuisuisa EU-p maanna siulittaasoqarfiata Luxembourgip kajumissaarutaa aqagu ulloqeqqanit minutsit pingasut kikkut tamarmik nipaallisimaqataassasut akuersaanngilaat.
Taamaalilluni Danmark EU-mut ilaasortanit kisiartaagunarpoq aqagu pingasunngornermi ulloqeqqanut aallannguuteqanngitsumik suliffiuinnartussaq. Folketingimi partiit tamarmik isumaqatigiissutigisaannik minutsini pingasuni aqagu nipaallisimatitsinnginnissaq aalajangiunneqarpoq Danmarkip spaatiummat minutsini marlunni ajunaartunik eqqaaniaalluni nipaallisimareernera unnersuussutigalugu.
Sverigemi, Norgemi Tysklandimilu naalakkersuisut nipallisimatitsinissaq inassutigaat, naalagaaffiit angallassissutaanni aamma tamani.