Nioqqutissat akikinnerusut pissarsiarisinnaalissavavut

Canadamut USA-mullu nioqqutissanik pisiortorneq ingerlallualerpat, inuillu nioqqutissat Canadaminngaanneersut sungiuppatigik, nerisassanik akikinnerusunik Canadamiit USA-miillu pissarsisinnaalissaagut, taama oqarpoq Aningaasanut nunanullu allanut Naalakkersuisoq Josef Motzfeldt.

- Tassa siullermik niuertut taanna suliassarivaat, niuertut ilisimavaat, pisisartuusugut pisiarisartagatoqqatsinnut qanoq aalajaatsigisugut. Immuit allaanerulaartut takugaangatsigit mamarnavianngitsutut isigisarpagut. Ilumoortorli mannaavoq, Danmarki nunarsuarmi nioqqutissanik niueqatigissallugu nunarsuarmi akisunerpaanut ilaammat. Taamaammat pisisartut angallannikkullu pissutsit aaqqippata, pisisartut paasigunikku Canadami USA-milu nioqqutissat taama pitsaatigisut, akikinnerusullu, taava qularnanngilaq niueqatigiinneq attaveqatigiinnerlu pitsaanerulissasoq. Aamma qularnanngilaq tasamanngaanniit pisiassat annertusiartortussat qularnanngilaq, aamma sanaartorneq eqqarsaatigalugu. Aamma qujanartumik umiarsuartigut timmisartutigullu angallanneq USA-minngaanniit ammaanneqartussaapput. Aamma Canadamiinninni paasivara, nunatsinni soqutigisarput, tassalu Narsarsuarminngaanniit Canadami illoqarfinnut anginernut timmisartuussisinnaaneq soqutigineqarpoq,

Josef Motzfeldt oqarpoq. Taanna aamma oqarpoq, Canadamut USA-mullu nunatsinniit toqqaannartumik angalasinnaalerneq aasaq manna pisinnaalissaasoq.