Nioqqutissaannaapput

Tamannalumi iluatsilluarpoq, allaammi immaqa Siumup qinersinermi ajugaassutigalugu. Aatsitassat pineqartillugit Kirkegaardip suna pineqarnersoq ilisimasaqarfigilluinnarpaa.

-Aatsitassaativut nioqqutissatut isigineqartariaqarput. Avatangiisinulli peqqissutsimullu akornutaanngitsumik ingerlatsinissaq pisariaqarluinnarpoq aamma nunatsinni suliffissaqartitsisinnaapput, taamaattumillu nioqqutitut isigisariaqarpagut. Aatsitassat, uulia gassilu aqqutigalugit aningaasaqarnitsinnik qaffassaanikkut atugarissaarnissarput qulakkeerniarsinnaavarput, Jens Erik Kirkegaard knr.-gl-imit apersorneqarluni oqarpoq.

Aleqa Hammondip Naalakkersuisunut siulittaasunngornerani royalties qitiusumik inissisimapput, aamma naalakkersuisooqatigiilersussat royaltiesit ingerlatsineqatigiiffinnullu akileraarutit oqimaaqatigiissillugit atorneqarnissaat isumaqatigiissutigisimavaat. Jens Erik Kirkegaardili kisitsisinik taakkartuerusuppallaanngilaq, naalakkersuitullu sulinini sungiulluarunik aatsaat itinerusumik oqaaseqarfigiumallugit.

-Siumup royaltiesinut ingerlatseqatigiiffinnullu akileraarutit pillugit isumaa pillugu oqaluttuarpassuupput. Eqqortorli tassaavoq royaltiesiy eqqussinnarlugit ingerlatseqatigiiffinnut akileraarut appartikkusukkatsigu, taamaattumillu ingerlatseqatigiiffiit akiligassaat taamaaginnassallutik. Aningaasanik isaatitsinissatsinnut piuserissaq allangortilaaginnarparput. Ingerlatseqatigiiffiup qanoq sivisutigisumik aatsitassaatitsinnik qalluinissamut periarfissaqarsimanersoq apeqqutaatillugu royaltiesit aaqqissuunneqassaappu, Jens Erik Kirkegaard oqarpoq, australiamilu pissutsit matumani isiginiartariaqassagigut aamma oqaatigalugu. Australiami saviminissamut nunamit anninneqartumut 7%-inik akiliisoqartarpoq.