Ninimik tapersersuerusuttorpassuit
Pinnersaaterpassuit, eqqumiitsuliat, qungasequtit nammineq qilattakkat taskillu tassani tuniniarneqarsimapput. Ilaatigut tujuulu nasartalik poppimik nipilersortartumit Jayimit (Nik og Jayimeersumit) tunniunneqarsimasoq ilaqutariit Tessingikkut 2061 koruuninik isertitsissutigisimavaat, Nini Tessingittaaq nammineerlugu pinnersaasianik nammineq ilusilersukkaminik tunissuteqarsimavoq.
Kalaallit Illuani Københavnimiittumi sulisut nammineq kajumissutsiminnik katersuiarneq aallartissimavaat. Susanne Jensenip paasissutissiissutigaa kingullermik kontu naatsorsuiffigineqarmat 54.000 koruunit katersorneqarsimasut, katersalloi inerniviat sisamanngormat aatsaat paasineqarumaartoq.
- Inuit tapersersuerusussimaqaat. Pingaartumik ilinniartorpassuit tunissuteqarsimanerat alutoraara. Taakkumi aningaasaateqarnerpaajunngillat. Aammattaaq Ninip arnaata suliatigut peqatigiiffik ilaasortaaffigisaa tunissuneqarsimavoq.
Nini Tessingip kræftimik napparsimalernerata kingorna suliniuterpassuit ingerlanneqarsimasut nuannaarutiga. Ilaatigut Kalaallit Nunaanni peqqinnissaqarfiup nunat tamat patilersinnissamut nalunaarsorsimaffianut allatsinnissaanut ammaassisimavoq, inuusuttoqatigiillu maanna kræftertunut ilaqutaannullu aningaasaateqarfimmik pilersitsinialerlutik. Nipilersoqatigiit Small Time Giant tallimanngorpat Nini Tessing katersuiniullu Kalaallit Illuanni Københavnimiittumi tusarnaartitsissapput, maajillu 31-iani Nuummi aamma tapersersuiniarluni aaqqissuussisoqassalluni.
Nini Tessing maanna Rigshospitalimit akissuteqarfigineqarnissani utaqqiinnarpaa, nunat tamat patilersinnissamut nalunaarsorsimaffianni inuunerminik annaassisinnaasumik nassaartoqarsinnaasoq utaqqillugu. Katsorsarneqarnini ilungersunarsimagaluaqisoq ilusilersuisartutut ilinnialernissaminut misilitsinnissani nukissaqarfigisimavaa.