Nina aamma Malik tusarnaartitsipput

Aappariit Nina aamma Malik ukioq ataaseq tusarnaartitsinikuunatik sapaammi Københavnimi tusarnaartitsipput.

Naak Københavnimi sapaammi siallersukasiugaluartoq, inuit 50-t missaanniittut Nunat Avannarliit killiit Københavnimi katersuuffianni tusarnaariarsimapput.

Erinarsortartoq Nina Kreutzmann Jørgensen uini Malik Hegelund Olsen, guitarertoq, ingiortigalugu nuannarineqaqisumik tusarnaartitsipput.

Aappariit Danmarkimi najugaqarput ilinniartuullutik. Malik Hegelund Olsen aasaq ingeniøritut naammassivoq, panissaarnermi kingorna sulinngiffeqarallarlunilu.

Nina Kreutzmann Jørgensen Zahles Seminariumimiit ilinniartitsisutut aappaagu naammassissaaq, nunatsinnullu uteqqinnissartik pilersaarutigaat.

Erinnat ilisimaneqarluartut nunatsinneersut nunanillu allaneersut ullumi tusarnaartitsinermi atorneqarput. Ole Kristiansenip Rasmus Rosingillu taalliaat ilaatigut atorneqarput, soorluttaaq Elton Johnip aamma Rod Stewartip erinniaat atorneqartunut ilaallutik.

Erinnialli nutaat aamma atorneqarput. - Erinniat CD-nngorlugit saqqummersinneqartussaapput. Ukiualunni tamanna pilersaarutaasimavoq, Nina Kreutzmann Jørgensen oqarpoq, nangillunilu:

- Atlantic Musicip Københavnimi immiussisitsiveqalersimavoq, tamannalu atorluarsinnaavarput Nina Kreutzmann Jørgensen naggasiivoq.