Nils Baum: Inuit Ataqatigiit Atassullu ukiumoortumik naatsoorsuutinik suli tunniussinngillat

Partiit ukiumoortumik naatsorsuutaat Inatsisartut Allattoqarfiannut takkussuutileruttorput, naatsorsuutinik tunniussinissaq ippassaanimut killeqarpoq.
Allattoq Dorthea Johansen
juulip 02-at 2014 11:22

Inuit Ataqatigiit aamma Atassut manna tikillugu suli tunniussisimanngillat, Inuit Ataqatigiit Atassullu ukiumoortumik naatsorsuutinik suli takkuttoqarsimanngitsoq Inatsisartut Allattoqarfiannit Nils Baum nalunaarpoq,  tigorusullugilli attavigereersimanerarpaat.  Atassut naatsorsuummik tunniussaqareernikuusimagaluarpoq, taannali utertissimagaat Allattoqarfik ilisimatitsivoq.
 
- Nassuiaatissartaa unaannaavoq allaffeqarfitsinninngaanniit atsiorneqanngitsoq nassiunneqarsimagami. Siulersuisut atsiorsimanngisaat. taamaattumik utertinneqarsimavoq. Soorunami maannakkut sulissutigaarput atsiornikoq nassiunnissaa, Atassutip siulittaasua Gerhardt Petersen nassuiaavoq.
 
Taassuma aamma nassuiaatigaa ukiumoortumik naatsorsuut missingiut suli piareerneqanngitsoq atsiorneqanngitsorlu kukkunikkut nassiunneqarsimasoq.
 
AAMMA ATUARUK Partiit ukiumoortumik nalunaarutaat takkussuutileruttorput

Atassut Siumullu Naalakkersuisooqatigiipput. Taamatut kukkuneq partiimut qanoq sunniuteqassanersoq Gerhardt aperaarput.
 
- Isumaqarpunga innarlinngitsoq naalakkersuisooqatigiinni imaluunniit partiitut tassami qangali naatsorsuutit naammassineqarnikuummata.
 
Piaarnerpaarlu atorlugu naammassineqarnissaa inassutigisimavaa.
 
- Allaffeqarfik oqaloqatigereerpara piaarnerpaamik atsiornikoq nassiutissagaat.
 
Inuit Ataqatigiit siulittaasortaavata ukiumoortumik naatsorsuummik piffissaq eqqorlugu tunniussisimannginnertik ima nassuiaatissaqartippaa:
 
- Upernaaq manna immikkut ittumik ataatsimeersuarnerput piffissamik annertuumik atuiffiginikuuarput. Allaffitsinnilu ikittuinnarnik sulisoqarpugut. Taakku tamaviaarlutik upernaaq tamaat sulinikuupput. Massakkullu naatsorsuineq kinguaattoorutigisimasarput naammassiliivipparput, kingusinnerpaamik aqagu naammassereersimassaaq, Sara Olsvig oqarpoq.
 
Inuit Ataqatigiit aningaasatigut aqutsilluarnissaq pingaartillugu oqartarput.
 
- Piffissaq eqqorlugu tunniussisarnissaq soorunami anguniarsariuaannarparput. Uanili iluatsinngitsoorparput. Ilaatigut upernaap ingerlanerani immikkut ittumik ataatsimeersuarsimanitta sulisutsinnut

suliakkiisorujussuunikuuvoq. Upernaaq tamaat aammalu inatsisartut ataatsimiinnerisa nalaani pimmat artorsaatigilaarsimavarput, sulisut eqqarsaatigalugit, Sara Olsvig oqarpoq.

Piffissarlu eqqorlugu tunniussinngitsoorsimanerat partiip iluani ajortoqarneranik pissutissaqanngitsoq oqaatigaa.
 
Ukiumoortumik naatsorsuutit tunniunneqarsimanngippata partiinut tapiissutit tunniunneqarsinnaanngillat.