Nillataartitsivik 25.700 koruunilik pisiaraa

Nukissiorfiit pisortaata Svend Ove Nielsenip ingerlaannartumik atuutilersussamik atorfimminit tunuartinneqarallarnissaa naalakkersuisunit ullumi aalajangerneqarpoq. Suliunnaarallartitsineq sapaatip akunnerini pingasuni atuukkallassaaq.

Kukkunersiuisut misissuisimaneranni ilanngussat isornarsinnaasut aalajangiinermut tunuliaqutaapput.

Kukkunersiuinermik ingerlatsitsiviup Deloitte-p sukumiisumik kukkunersiuineratigut paasinarsivoq Nukissiorfiit pisortaa Svend Ove Nielsen ingerlatseqatigiiffiup akiligaanik namminerminut pisiortortarsimasoq, tamanna naalakkersuisut tusagassiuutinut nalunaarutaani atuarneqarsinnaavoq. Nalunaarummi allassimanngilaq qanoq annertutigisumik atuitigisoqarsimanersoq.

Nukissiorfiup pisortaata aningaasanik atuisimanera pillugu Inuussutissarsiornermut pisortaqarfik nassuiaatinik marlunnik pisimavoq, nassuiaatinili naammaginartumik nassuiaasoqarsimannginnerarlugu suliaq eqqartuussissuserisumut nalilertinneqarpoq.

Nukissiorfimmi pisortap aningaasanik atuisimanera Nukissiorfimmut piginnittunullu annaasaqaataasutut nalilerlugu, pisortaq Svend Ove Nielsen erngerluni suliunnaarallartinneqassasoq naalakkersuisut aalajangerpaat.

Tamanna pillugu Naalakkersuisut aalajangerpaat Svend Ove Nielsenip soraarsinneqarnissaanut suliaq aallarnerneqassasoq.

Pisimasut pillugit Svend Ove Nielsen radioaviisimut oqaaseqarumanngikkallarpoq, suliaq suli ingerlanneqarmat. Svend Ove Nielsenilli innersuussutigaa naalakkersuisoq Johan Lund Olsen oqaloqatigisinnaassagipput.

Inuussutissarsiornermulli naalakkersuisoq tusagassiuutitigut oqaaseqarumanani nalunaarpoq, naalakkersuisullu tusagassiuutinut nalunaarutaat innersuussutigiinnarlugu.

Suliap naammassineqarnissaata tungaanut Nukissiorfiup teknikkikkut pisortaa, Svenning Møller, pisortaagallartutut ivertinneqarpoq.

- Suliffeqarfiup killiffia ilungersunarpoq, kisianni suliaq suliffeqarfiup ingerlaneranut aallutaanullu unitsitsissanngilaq, pisortaagallartoq Nukissiorfiit internetikkut nittartagaanni allappoq.

250.000 koruunit sinnerlugit atorlugit Svend Ove Nielsen allaffimminut pequtisiniarsimasoq siornatigut saqqummereerpoq.

AG-p allagaatinik takunnissinnaatitaaneq atorlugu paasisai malillugit, 74.000 koruuningajaat atorlugit Nukissiorfiit pisortaata inaanut pequtisiniartoqarsimallunilu igaffimmut atortorissaarutisiniartoqarsimasoq aamma atuarneqarsinnaavoq.

Nillataartitsivik 25.700 koruunilik pisianut ilaavoq.