Nikoline Ziemer IA-mut nuuppoq

Sorlaat Partiiannik pilersitsisoq Nikoline Ziemer nalunaarpoq Inuit Ataqatigiinnut ilaasortanngorniuteqarluni.
Allattoq Najaaraq Egede
aggustip 03-at 2010 13:18

Nikoline Ziemer KNR-imut oqarpoq, Sorlaat Partiiani tallimanngorpat ataatsimeersuarnermi partiip matunissaa eqqartugassanut ilaasoq. Matoreeriarpallu IA-mut ilaasortanngorumaarluni. Oqaatigaa siulersuisoqatigimi tamarmik Sorlaat partiiata matuinnarnissaa tapersersoraat.

IA-mut ilaasortanngorniarluni nalunaarnera pivoq sapaatip akunnerata naanerani Inuit Ataqatigiit Qoornumi aasaanerani naapinnerisa nalaanni. Nikoline Qoornumi aamma peqataavoq.

-Inuit Ataqatigiit naalakkersuinikkut siunnerfiat nuannut tulluartoq uppernarsivara, Nikoline Ziemer Qoornumi oqarpoq.

Nikoline Ziemer Inuit Ataqatigiit Kattuffiata Nuummi immikkoortoqarfianut Nuummi Inuit Ataqatigiinnut (NIA) ilaasortanngorniarluni qinnuteqarpoq. NIA-p siulittaasua Mille Søvndahl Pedersen nutaamik pitsaasunillu nukilimmik ilaasortartaarnertik nuannaarutigalugu nalunaarpoq Nikoline Ziemerilu partiiminnut tikilluaqqullugu.