Nikolaj Jeremiassen: Appanniaqqusaanngilluinnarneq akuerinngilara
Pinngortitaleriffiulli kaammattuutai aallaavigalugit appanniartarnermut sukaterisoqassanersoq pillugu naaperiartitsisoqartussanngortoq, Nikolaj Jeremiassen oqarpoq.
- Pinngortitaleriffiup kaammattuinera innersuussineralu aallaavigalugit suliaqarpugut, Nikolaj Jeremiassen oqarpoq.
Paragraf 37 naapertorlugu Naaja Nathanielsen Nikolaj Jeremiassenimut uumasunik timmissanillu piniarnermut nalunaarummi sukaterinissaq pillugu apeqquteqaateqarpoq.
Aamma atuaruk Naalakkersuisoq: Appat eqqissisimativinneqassanngillat
Naak biologit siunnrsuusiaat septembarimi aatsaat piareertussaagaluartoq, appaqarfiit ikilipiloorsimasut oqaatigineqarpoq. Sivikinnerpaamillu ukiuni qulini eqqissisimatitsilluinnarnissaq pisariaqarsinnaasoq, Pinngortitaleriffiup juunimi oqaatigalugu.
- Ukiuni qulini matoqqartitsinissamut tunngasoq massakkut akuersaanngilara. Taamaattorli piniagaanerisa sivikillinissaat aammalu pisaasartut ikilinissaat ornigineruara, Nikolaj Jeremiassen oqarpoq.
Aamma atuaruk Pinngortitaleriffik iliuuseqaqqusisoq: Appat ukiuni qulini eqqissitivinneqarlik
Pinngortitaleriffiup kaammattuutai maleqqissaarnissai piumasaqaataanngitsoq Nikolaj Jeremiassenip erseqqissaatigaa.
Appanik eqqissisimatitsilluinnarnissaq atuutilissappat nunatsinni kalaaliminernik nerisaqarnikkut sunniuteqarsinnaannera aarleqqutigaa, nunatsinnimi meerartagut inuusuttagullu kalaaliminernik nerisartagatoqqanut soqutiginnikkunnaariartorsinnaammata, Nikolaj Jeremiassen isumaqarpoq.
Nuna tamakkerlugu appat nungutaanissaminnut aarlerinartorsiortinneqartut Pinngortitaleriffiup allaaseraa, avannaanili appat inaannik peqarluarmat Nunatsinni aarlerinartorsiunngitsut Nikolaj Jeremiassenip oqaatigaa.
Sumiiffinnilu ataasiakkaani appat ikiliartortut taassuma nassuerutigaa.
Pinngortitaleriffiup kaammattuutai piareeriarpata appanniarnermut maleruagassat sukaterneqassanersut Naalakkersuisut nalilersorumaarpaat.