Nikolaj Heinrichip Japanimiut suliniutai tapersersorpai
Umiarsuarmik piginnittut Peaceboatimik atillit Japanimi Hiroshimaminngaanneersuupput, atomimillu sakkussiarsuit siammarterneqannginnissaat pillugu suliniuteqartuullutik.
Atomimik qaartartorsuaq Hiroshimami sorsunnersuup kingulliup naalernerani qaartinneqarpoq.
Japanimiut 1000-it sinnerlugit amerlassusillit takornariartaammut Clipper Pacificimut ilaapput, illoqarfiillu tikinneqartartut borgmesterii kaammattorneqartarput atomimik sakkussiarsuit siammarterneqannginnissaannut atsiortitsinermut peqataaqqullugit.
Nuup borgmesteria Nikolaj Heinrich Japanimiut suliniutaannut tunngatillugu ima oqarpoq:
- Taassumunnga tunngatillugu ippassaani saaffigineqarama naatsorsuutigaara atsiorniarlunga. Pissutigalugu kalaallit amerlanerpaartaasa uranimut naaggaartuusut ilisimagakku, Nikolaj Heinrich oqarpoq, nangipporlu:
- Takornariaqartitsineq sorsunnermillu akerliuniarneq akuliunneqanngitsoq isumaqarpunga. Takornariartaat nunarsuaq tamakkerlugu angalaartarsimavoq, borgmesterillu assigiinngitsut pinngitsaaliissutaanngitsumik atsioqataasarsimallutik, nammineq inuttut isumartik aallaavigalugu atsiorsinnaanersut, Nuup borgmesteria Nikolaj Heinrich oqarpoq.
Takornariartaat Clipper Pacific 1000-inik ilaasoqarluni tikissaaq, umiarsuarlu takornariartaat alla aamma tikissalluni, tassa amerikamiut takornariartaataat Aurora 1900-nik ilaasoqarluni tikissagami.