Nikolaj Heinrich: Mittarfissuaq suli kissaatigaarput
Nuup Ilulissallu Atlantikoq qulaallugu timmisartuussinernut timmisartorsuarnut mittarfiit tallinissaannut siunnersuummut Air Greenlandip pisortaata isumaqataannginnera paasilluarsinnaavarput, tassami illoqarfiit pineqartut Kangerlussuullu akornanni timmisartuussinerit tassaammata, nunatsinni Air Greenlandimut akilersinnaanerpaamik timmisartuussiviusut, Nuummi borgmesteri Nikolaj Heinrich oqarpoq.
Air Greenlandip pisortaa Michael Binzer radioavisimut ippassaq oqarpoq, Nuup Ilulissallu mittaarfiisa l799 meterinut tallineqarsinnaanerat isumaqatiginagu, 1200 meterinut talliliinissaq naammammat. Tamannali Nuup Kommuniata isumaqatiginngilaa.
- Timmisartuussinerit Nuummiit toqqaannartumik Europamut kimmullu ammaanneqarnissaat isummatsinniittuarpoq aamma tamanna allanngortinneqarnavianngilaq, Nikolaj Heinrich oqarpoq.
Nuummiit Ilulissanillu angalaniartilluni Kangerlussuakkoortariaqartarneq pisariaqanngilluinnartumik piffissamik aningaasarpassuarnillu atuititsisartoq aamma oqaatigaa.
- Kiisalu CO2-mik mingutsitsinerit annertusiartuinnartut pilersinneqartarput politikkikkut sulinermi qaangiinnagassaanngitsut, neriuutigeqaarput tamakku tamaasa Inatsisartut Nuup Ilulissallu mittarfiisa tallinissaat ataatsimiinnerminni oqaluuserilerunikku eqqarsaatigilluarumaaraat, Nikolaj Heinrich naggasiivoq.
