Nikolaj Heinrich amerlanerussuteqanngilaq
Nikolaj Heinrich arfineq-pingasunit taaneqarpoq (Siumut aamma Atassut), Per Berthelseni tallimanit taaneqarluni, Demokraatit ilaasortaatitaannit tamanit. Inuit Ataqatigiit kommunalbestyrelsimi sisamanik ilaasortaatitaqartut taaseqataanngillat.
Qinersinerup inernerata takutippaa Nikolaj Heinrich kommunalbestyrelsimi isummanik naapititsiniaassatilluni politikkiminillu amerlanerussuteqalersitsiniartarnissamini politikkikkut suliassamik imaannaanngitsumik suliassaqalersoq. Borgmesterinngorlaap kommunalbestyrelsimi Atassutip ilaasortaatitatuaannit Hans Pavia Egedemit tapersersorneqarnissani qularnaaqqasungavaa. Kisianni Siumup ilaasortaatitai afineq-marluusut Atassutikkullu ilaasortaatitaat ataaseq kommunalbestyrelsimi amerlanerussuteqanngilaarput, Demokraatit Inuit Ataqatigiillu katillutik qulingiluanik ilaasortaatitaqarmata.
Malînánguak Marcussen-Mølgaard, Inuit Ataqatigiit, borgmesterip tulliatut siullertut ingerlaannassaaq, Per Berthelsen Demokraatineersoq borgmesterip tulliata aappaattut ingerlaannassalluni.