Nikolaj Coster-Waldau: Ataatsimoorluta nukittunerusarpugut
Nuummi ukiorisseruttornerani nillataarpoq.
Isiginnaartitsisartoq nunarsuaq tamakkerlugu ilisimaneqarluartoq Nikolaj Coster-Waldauip Nuummi angerlarsimaffianut KNR-imit apersoriartorparput. Apersuineq Katuamiissasoq pilersaarutaagaluarpoq piffissarli kingulleq atorlugu angerlarsimaffiani pisussanngorluni.
Matukkut kasuttoratta tusaamasarsuup Game Of Thronesimit inuttaaqataanermini nalunnginneqarluartup matumik ammaappaatigut. Taanna kamillaaruserluni tikilluaqqulluta iseqquaatigut.
Ikinngutigiinneq uummaniarnermut aqqutaasoq
Nikolaj Coster-Waldauip isiginnaagassiaq suleqataaffigiutigalugu inuttaaffigisani ”Against the Ice” takutikkiartorlugu Nuummiippoq.
Isiginnaagassiaq qallunaat tunup avannaani 1909-mi ilisimasassarsiorlutik angalanerannut "Alabama-ekspedition"-itut ilisimaneqartumut tunngasuuvoq.
Ilisimasassarsiortut siulii "Danmark-ekspedition"-itut ilisimanertumi ajunaartut ujarneqarput.
USA-p nunatta avannaata ilaa USA-mut ataneraanera ilumuunngitsoq uppernarsarniarlugu ilisimasassarsiortoqarpoq.
AAMMA ATUARUK Isinnaagassiaq takuteqqaarneqartoq: Coster-Waldau nunatta inuilaarsuani uumaniartoq
Ilisimasassarsiortut ittuat Ejnar Mikkelsen maskinmesterilu Iver Iverseni qimussimik angalanerminni periarfeerunneqarput. Taakku Kalaallit Nunaata pinngortitaani peqqarniissinnaaqisumi ulluni 865-ini uummaniartussanngorlutik.
- Uummaniartunut oqaluttuat nuannaraakka. Unalu oqaluttuaq arlaatigut immikkuullarissuseqarpoq. Angutit angalaqatigiit ataqatigiinnerisa ineriartornerat soqutiginartorujussuugami, Nicolaj Coster-Waldauip ilisimasassarsiorlutik angalanikut ikioqatigiillutik uummaniarnerat pillugu oqarpoq.
- Ejnar Mikkelsen kaptajniuvoq issittumilu paasisassarsiortarnerminik tusaamasaalluni. Iver Iversenili mekanikeriuvoq jyllandermiu piaarinaatsoornerinnarmik angalaqataasoq. Paasisassarsiortutut angalasuunissani siunertarisimanngilaa. Alapernaatsuuvoq, neriulluarniartuuvoq eqqarsarsimallunilu - taamaaliukutsoorsinnaavunga.
Ejnar Mikkelsen nukittunerusutut oqaluttuami ersersinneqaraluartoq isiginnaagassiap naajartornerani kisimiilluni annanniarsinnanngitsoq paasinarsivoq. Taanna inuusuttumut misilittagaqanngitsumut Iver Iversenimik isumalluuteqarluni inuilaarsuarmi ulluni 865-ini aniguiniarsarivoq. Inuusuttormi eqqarsartaatsimikkut nukittuneruvoq.
Inuit ataatsimoortillutik nukittunerulertarnerat isiginnaartut pissarsiaqaatigissagaat Nikolaj Coster-Waldauip neriuutigaa.
"Nuannaaqatigiittarsimavugut nuannaarutissaqartilluta. Nikallungaqatigiittarnikuuvugut ullut siunissarlu tarrajutsillugit, perlileqatigiittarlu qiulerlutalu. Inuunerput akigingajassimavarput ataasiaannavillutalu isumaqatigiinngerujussuarsimavugut akeqqersuullutalu - tassalu arnap assiga postkortimiittoq pillugu" Ejnar Mikkelsen ikinngutini Iver Iversen pillugu atuakkiamini "Farlig Tomandsfærd"-imi taama allappoq.
Tunup avannaani paasisassarsiorlutik angalasut ulluni 865-ini kisimiikkaluarlutik ataasiaannavillutik kamaassimapput. Tassalu arnap assinga postkortimiittoq pillugu.
- Sorømi ningiunngorniarfimmi arnat inuusuttorpassuit assiat pillugu kamaapput. Ilisimasassarsiortut tamarmik arnaatissaminnik assimit toqqaapput. Iverip pingasut toqqarai Ejnarip ataaseq toqqarpaa. Tassalu taakku angalaqatigiinnerminni isumaqatigiinngissutituaanni eqqaaneqartoq. Iverip Ejnarip arnaataa tiingavigalugu ullut ilaanni sinnattoorisimavaa, taannalu Ejnarip ajorisorujussuuvaa.
- Misissuinitsi Ejnari Iverilu utoqqanngoreerlutik oqaluttuartut nassaaraarput. Inuunertik tamaat ikinngutigeereeraluarlutik Ejnar MIkkelsenip pakatsisimanini eqqaanngitsoorsinnaanngilaa. Taanna oqarpoq "taamanimaa illit pakatsisipparma arnaatinnik arsaaramma", Nikolaj Coster-Waldau oqarpoq, nangipporlu:
- Taakku arlaannaalluunniit kisimiissimasuugunik annassimanissaat qularnarpoq. Kisermaaniarsinnaalluta ullutsinni inuuvugut, ataatsimoorlutali nukittunerusarpugut. Isiginnaagassiamilu uani taanna ersersinniarsimavarput, Nikolaj Coster-Waldau oqarpoq.
Illit inuuninni kina Iver Iverseniua?
- Iluanaartorujussuuvunga. Ilaqutaqarpunga ikinnguteqarlungalu. Kisimiittussiaanngilagut avatangiisitsinnit nukissanittarpugut.
Danmarkip USA-llu nunarput qanga ullumikkullu pilerngukkaat
Issittup avannarliup piffissami paasisassarsiorfigineqarnerpaaffiani isiginnaagassiaq Against the Ice pisuusaartinneqarpoq. Kalaallit Nunaata Danmarkimit nunasiaatigineqarnerata nalaani.
Qallunaat naalakkersuisuisa Kalaallit Nunaata avannaata ilaa tikinneqarsimanngitsup nunap assiganik suliaqaqqusinerat, soorlu Knud Rasmussenimut, Peter Freuchen, Ludvig Mylius-Erichsen Ejnar Mikkelsenimullu, USA-p nunatta ilaanut piginnittuuniarneranut atassuteqarpoq.
Nikolaj Coster-Waldau Ejnar Mikkelseniusaarpoq "Against The Ice"-mi. 1900-ju aallaartilaarnerani Danmarkimit paasisassarsiortut arlallit Kalaallit Nunaata avannaarsuarliartinneqarput.
Assi: Lilja Jonsdottir/Netflix.
Pisimasoq qangarsuanngoreeraluartoq Kalaallit Nunaannut isaasalerlugu piginnittuujumanermut apeqqut ukiut pingasut matuma siorna oqallisaaqqilerpoq. Taamani amerikap præsidentiata Donald Trumpip nunarput pisiariumagaluarpaa.
- Isiginnaagassiap immiunneqartinnagu piareersarnerata nalaani Trumpip Kalaallit Nunaat pisiarerusullugu suaarutigaa. Allanngortoqarnikooqaaq kisianni pissutsit suli taamaapajaarput. Quinaannarporluunnit Danmarkip USA-llu Kalaallit Nunaata pilerngunnikuummassuk, Nikolaj Coster-Waldau oqarpoq.
Qallunaat Kalaallit Nunaannik nunasiaateqarnikuunerannut isiginnaagassiaq tunngassuteqassanngitsoq Nikolaj Coster-Waldauip Peter Flinthillu aalajangerpaat.
- Isiginnaagassiap ilaani oqaloqatigiinneq nunasiaateqarnerup nalaani pissutsinik ersersitsivoq. Nuna taama mikitigisoq nunarsuup sinneranit soqutigineqartorujussuusoq quianaannarpoq, kisianni oqaluttuami Ejnar Mikkelsen Iver Iversenilu pingaarnerutippagut, taanna oqarpoq.
Ataqatigiinnerup ersersinnissaa pingaartikkaa
Qallunaat nangeqattaartuliaat "Borgen" Kalaallit Nunaanni pisoq isiginnaartitsisartunik nunatsinneersunit peqataaffigineqartoq DR 1-mi maanna isiginnaarneqarsinnaavoq.
Isiginnaagassiami Against The Icemi kalaaleqatitsinnik inuttaasoqanngilaq, naak pisuusaartitaq tunup avannaani pigaluartoq. Taamannallu aalajangerneq pissutissaqarluartoq Nikolaj Coster-Waldau oqarpoq.
- Oqaluttuaq angutinut inuttaasunut pingaarnernut marlunnut tunngassasoq aalajangernikuuarput. Allatut suliarineqarsimasinnaagaluarpoq uagulli taamaaliussalluta aalajangersimavarput.
Isiginnaagassiami kalaallinik inuttaatitaqartoqanngikkaluartoq nunatsinneersut assiliissutip tunuani ikiuupput. Kalaallit isiginnaagassialiortartut siunnersortigineqarput qimussertartullu aamma ikiortigineqarlutik. Oqaluttuaq nunatsinni pinikuummat kalaallinik peqataatitsinissaq Nikolaj Coster-Waldauip pingaartipaa.
Against the Ice Netfliximi marsip aappaani saqqummissaaq. Netfliximi atuisut nunanit 190-ini milliardip affaa missaanniittut isiginnaarsinnaalissavaat.