Nikkut amerlanerusariaqartut, KNAPK isumaqarpoq
Arferit pisarineqartartut neqaasa annersaat innuttaasunit pisiarineqartarmat, nikkunngorlugit tunisassiassat ullumikkut annikippallaartut KNAPK-miit oqariartuutigineqarpoq.
Arferup neqaa 540 tons-i ukiuni tallimani kingullerni nunatsinni nerineqarsimapput. Ukiunili siuliini arferit pisarineqanngitsoortartut aallaavigalugit pisassat annikillisinneqarnikuupput. Tamanna 1990-mi IWC-ip arferit neqaasa nunatsinni nerineqarsinnaasut annertussuserisinnaasaanik aaliangiineranit annikinneruvoq.
Tassa siusinnerusukkut arferup neqaasa tunisassiarinissaat nunatsinni annerusumik piorsaaffigineqarsimanngimmat. Ullumikkulli Maniitsumi Arctic Green Foodtip piorsarluagaanik arferit neqaannik panertitsiveqalersimavoq ineriartortitsiviulluartumik.
Taamaammat arferit neqaasa tamakkiisumik atorluarneqarnissaannut IWC-ip naatsorsugai piviusunngortinneqarluarsinnaalersut KNAPK-mit oqaatigineqarpoq:
- neqissaqarniarnerput eqqarsaatigalugu kalaallit nunaata neqissaqarniarneq nammakutsoorsinnaavaa pingaartumik aamma KNAPKmiit tapersersorluinnarparput aalisakkat taavalu arferup neqaanik panertuliat tamakku nunatta iluani nioqqutissiarineqartartut tamakkua qaffassarnerat ukiuni kingullerni assorsuaq nuannaarutigisimavarput kissaatigalugulu aamma ukiuni tullerni ornitatsinni aamma aalisakkat taamatullu aamma arferup neqaanik panertitsineq nunatsinni ingerlalluarumaartoq Taamatut oqarpoq KNAPK-ip siulittaasua Peter Olsen.
Arferit pisarineqarsinnaasut amerlisaqqinneqarsinnaanerannut aamma neriunartoqartoq Amalie Jessen-ip Aalisarnermut Pisortaqarfimmi pisortaasup saqqummiussinermini oqaatigaa, IWC-ip 670 tonsinik annertussusiliinera 1990-mi pisimammat, massakkullu ukiut 17-nit taamanimiit qaangiusimalereermata nunatsinnilu innuttaasut taamanikkumiit 5.000-it pallillugit amerlanerulersimammata agguaqatigiissillugu neqissaqarniarnermut naatsorsueriaaseq IWC-ip nutaamik kiseqqissaguniuk arferit suli amerlanerit nunatsinnit pisariaqarsinnaaleriaannaammata.
Eqqumaffigisassalli ilagaat ullumikkut IWC-mut naalagaaffiit ilaasortanngorsimasut amerlasuut arfanniarnermut akerliusuummata.
