Nikku: Partiitut nutaajunerput nukilaaqutigaarput

Aningaasanut inatsisissaq aappaagumut atuuttussatut siunnersuut eqqarsaatigalugu, partiit Naalakkersuisooqataasut ataatsimoorussaqarnerusimasinnaagaluartut, Patii Inuit siulittaasuat, Nikku Olsen oqarpoq.

- Isumaqarpunga Naalakkersuisooqataasut pingaarnersiuineranni partiitut ataatsimoorussaqarnerusinnaagaluartugut, tassami aningaasanut inatsisissatut siunnersuummi sunniuteqangaannginnitsinnut pissutaanerpaavoq, aningaasaqarnermut ataatsimiititaliamiititaqannginnattaluunniit.

Partii Inuit qaammatini arfiniliinnarni pisoqaassuseqartup siulittaasua, Nikku Olsen oqarpoq.

Nunatta politikkikkut ingerlanniarneqarnera eqqarsaatigalugu, partii nutaaq akisussaaffimmik taama annertutigisumik tigusisoq, aallaqqaammut sunniuteqanngitsutut isigineqassappat, tupinnartutut tamanna isigineqarsinnaanngitsoq, Nikku Olsen oqarpoq.

- Soorunami aningaasanut inatisissamut timitaliiniarnerput sapinngisarput tamaat atorlugu ingerlanniartussaavarput. Isertuunneqarsinnaanngilarlu partiitut aatsaat ukiup affaata missaani ingerlativugut, taamaattumik misilittaakkavut partiinut allanut sanilliullugit nutaajunerpaapput, taamaattumik ilisimasavut suli killeqarput. Anguniakkavulli pingaartillugit ingerlatsivugut, tamanna isertuunnagu oqaatigissavara.

Nikku Olsen oqarpoq imalu nangilluni.

- Aamma oqaatigissavara Naalakkersuisooqatigiilernitsinni ersarissumik isumaqatigiissutigigatsigu, isumaqatigiissutigut nutarteqqittuaannarneqarsinnaasut, tassami Nunarput eqartumik ingrlanneqassanngimmat taama isumaqatigiinnikuulluta.

Nikku Olsen oqarpoq.

Aningaasanut inatisissatut siunnersuut eqqarsaatigalugu, Nunaqarfinni isorliunerusunilu pissutsit pitsanngortinneqarnissaat, Partii Inuit qinersisiminnut neriorsuutigaat.

- Inuussutissarsiornermut tunngatillugu isorliunerusuni nunaqarfinnilu pissutsit atugassarititaasut pitsanngorsaavigineqarnissaat Partii Inuit sulissutigiuassvaat. Tassami aningaasat amerlasuut suli inississorneqavinngillat, tassa tamannaavoq sulissutigisassarput sunniiniaqataaffigisassarpullu, tassami Nunarput ataatsimut isigalugu assigiinnerusumik ingerlanneqartariaqarmat.

Partii Inuit siulittaasuat, Nikku Olsen taama oqarpoq.