Nikku Olsenip ICC isumaqatiginngilaa
Lyngep oqaatigaa kikkut tamaasa inissaqartinneqartariaqartut oqallinnerlu oqaatsinut tunngassuteqarani ilinniarsimassutsip qaffasissusaanut inuiaqatigiinnilu naligiinngitsumik inissisimasoqarneranut tunngassuteqarnerusoq. Nikku Olsenilli tamanna isumaqatiginngilulinnarpaa. Nunatsinni sumiorpaluutit ilaasa tammariartulernerat assersuuteqarfigai. Avanersuarmi Inughuit oqaatsitik annaasimasutut allaat misigilersimapput.
- Taamatullu ippoq Tunumi Iivit kitaamiut oqaasiinik atuartitaanikkut sutingut tamatingut inissisimammata. Inugguit Iivillu atuarfimmi periarfissaqanngillat oqaasileritinneqassallutik ineriartortinneqassallutillu oqaatsimik piujuarnissaannut tammattaaliueqataassallutik. Ullorlu manna tikillungu nunarsuaq tamakerlungu Oqaatsit Ulloqartinneqaraangata Kalaallit Nunaanni ikinnerussuteqartut Inughuit Iivillu oqaasii eqqartorneqarneq ajorput, Nikku Olsen oqarpoq.
Partii Inuit siulittaasuata ICC-p siulersuisuini ilaasortat siulittaasumik oqaaseqaataanut isumaqataanersut, Partii Inuillu kalaaliviuneruneqqusaannermut saatitsiniarneraaneranut, inuiaqatingiinnilu oqaatsit pillungit oqallinnermut naggaseeqqusinera isumaqataanersut aamma paaserusuppaa. Aamma naggueqatitta Inuit siulittaasup kalaallisuinnaq oqaaseqartunut isummernera isumaqataaffigineraat paaserusuppaa.
-Partii Inuini pingaartiparput kalaallisut oqalunnermik ilinniarumasut tapersersussallutigit, tamannalu politikkeraarput malittarisassatsinni atuarneqarsinnaasoq. Taamaattumik qallunaatuinnaq oqaasilinnut tikilluaqqusinngittutut isiginiarneqarnerput kukkusuuvoq eqqortuunanilu, paasineqartariaqartorli tassaavoq kalaallisuinnaq oqaasillit atungarisaasa pittanngorsaavingineqarnissaannut sallersaalluta suliniuteqartuungatta, Nikku Olsen isumaqarpoq.
Partii Inuit oqaatsit pillugit unnugu oqallinnissamut aggersaavoq. Oqallitsitsineq USK-ip kantiinaani nal. 19.00-mit 21.00-mut ingerlanneqassaaq. Oqalutseqassaaq, taamaammat kalaallisut danskisullu oqaasillit peqataalluarsinnaapput.
