Nikku: Markus E. Olsen partiimik pilersitseqataanngilaq

Partiit Inuini ilaasortat nuimanerit ilaat, Markus E. Olsen, partiimi sunniuteqaqataasinnaannginnini naammagiunnaarlugu ippassaq partiimit tunuarpoq. Partii Inuit ilaasortaminit nuimanernit tununneqartarnermik sakkortuumik eqqugaaqqavoq.

Allattoq Peter Troelsen, Simon Uldum

septembarip 24-at 2013 08:46

Inatsisartunut ilaasortap Lars Peter Mathæussenip partiimit ilaasortaajunnaarluni partiimut naalakkersuisooqataasumut Siumumut nuuppoq, partiillu Inatsisartunut marsip qaammataani qinigassanngortitai allat marluk ullunilu kingullerni partiimit aamma tunuarput.

Markus E. Olsenip partiimit tunuarneranut atatillugu Nikku Olsen tusagassiorfinnut nalunaaruteqarpoq. Tassanilu ilaatigut oqaatigaa Markus E. Olsen partiimik pilersitseqataasutut isiginagu.

- Matumuuna nalunaarutigissavara Partii Inuit sinnerlugit Markus E. Olsen tunuarneranut atatillugu saqqummiunneqaqattaarmat Markus E. Olsen Partii Inuit-mik pilersitseqataasimasutut. Tamanna Eqqunngilaq, Markus E. Olsen Partii Inuit-nik pilersitseqataanikuunngilaq, pilersitsiniarnermilu peqataanikuunnani, Nikku Olsen nalunaarpoq.

Markus E. Olsen Inatsisartunut qineqqusaarnermi Partii Inuit tunulequtaralugu sassarnikuuvoq. Partii Inuit siulersuisoqarput aammalu siulersuisut aqutsinerat toqqammaviuvoq partiimi ingerlatsinermut.

Partii Inuit siulersorneqarnerat malittarisassat malillugit ingerlanneqarpoq, inunnullu ataasiakkaanut tutsitsiniarneq pissusissamisoortutut isiginngilarput, Nikku Olsen, partiip allattaatut atorfeqartoq allappoq.

Nikku: Markus E. Olsen partiimik pilersitseqataanngilaq

Aamma atuaruk