Der er flere nye ansigter at finde blandt Inatsisartut-medlemmerne her fem måneder efter valget. Assi: Malik Brøns / KNR

Nikisiterineq, sulinngiffeqarneq pisoqarfiuneralu: Inatsisartuni kikkut issianersut nalunngiliuk?

Ukiakkut ataatsimiittoqaleruttorpoq. Inatsisiliortulli aqqi nalunngiligit? Imaluunniit politikkikkut nikerartoqarnera paatsuungassutigaajuk? Paatsuunganngikkaluaruilluunnit uani ataatsimut isigalugit takusinnaavatit.

Ataaseq iseraniluunniit tunuarpoq, alla napparsimaneq pissutigalugu sulinngiffeqarpoq, pingajuallu unikkallarnissamik pisariaqartitsilluni.

Taama nikisiterisoqarpoq, maannalu politikkikkut malinnaalluinnaraluartorluunniit malinnaaniaqqissaartariaqarpoq.

Inatsisartunimi politikerit ulluni makkunani ukiakkut ataatsimiinnermi ataatsimiittut upernaaq qinersisoqarnerani qinigaasunit allaanerupput.

Qinersinermi inernerit maannalu Inatsisartut katitigaaneranniittut sanilliukkaanni Inatsisartuni qinigaaffinnit 31-nit aqqanillit taarserneqareerput.

Amerlanerillu Naalakkersuisunut iserneranni Inatsisartuni sulinngiffeqarallarnerannik nassuiaatigineqarsinnaapput, taamaammat taakku sinniisussanit taarserneqarput.

- Avataanit Naalakkersuisunngortitsisarneq nalinginnaavallaanngilaq, Inatsisartuniillu tigusisoqarneratigut pineqartoq Naalakkersuisuni sulinissani pissutigalugu Inatsisartunit sulinngiffeqarallarnissamik qinnuteqartarpoq, Ilisimatusarfimmit ilisimatooq, Birger Poppel nassuiaavoq.

Sinniisussanit qulinit arfineq-marluk sulisut

Inuit Ataqatigiit Naalakkersuisuni atuuffeqarnerpaapput, taamaammat partiimi tassani sinniisussanik atuisoqarnerpaavoq.

Inuit Ataqatigiinni sinniisussanit qulinit arfineq-marluk maannakkut atuupput. Taakkunannga arfinillit suleqataasa Naalakkersuisunngornerat pissutaavoq.

Inatsisartunut qinikkat 31-t.

Inuit Ataqatigiit aqqaneq-marlunnik qinigaatitaqarpoq.

Siumut qulinik qinigaatitaqarpoq.

Demokraatit pingasunik qinigaatitaqarpoq. 

Naleraq sisamanik qinigaatitaqarpoq. 

Atassut marlunnik qinigaatitaqarpoq. 

Kingullerlu Stine Egede Kommune Kujallermi borgmesterinngornera pissutaavoq.

Taavalu Eqaluk Høegh (IA) uippakajaarnini pissutigalugu meeqqanut inuusuttunullu Naalakkersuisuuffimminit tunuarpoq.

Taanna Inatsisartunit juullip tungaanut sulinngiffeqarpoq.

Taamaammat Inatsisartuni tassunga sinniisoq Mariia Simonsen tassani atuuffimmiilerpoq, Naalakkersuisunilu atuuffigisaa Naleqqamit Paneeraq Olsenimit nanginneqarluni.

Inuit Ataqatigiit Inatsisartuni ilaasortaatitaasa aqqi assingilu uani takukkit.

Kielsen sulinngiffeqartoq

Alla Siumup siulittaasorisimasaa Kim Kielsen aamma sulinngiffeqarpoq. Taanna Eqaluk Høeghitulli qinersisoqarnerani taaguunneqangaatsiarpoq.

Taamaammallu qinersisartut ilaat pakatseqqasinnaassut, Birger Poppel erseqqissaateqarpoq:

- Taakku marluk qinersinermi taaguunneqangaatsiarput, taamaammallu qinersisartut kissaatigisaattulli ilaanngikkaluarlutik soorunami ilaapput. 

Kielsen novembarip ulluisa 30-ata tungaanut sulinngiffeqarpoq, taamaammat Nikkulaat Jerimiassen tassunga sinniisutut atuuppoq.

Siumumi sinniisussat marluk atorneqarput.

Siullermik qinersisoqaqqammernerani atuuttoqalerpoq, tassa Qarsoq Høegh- Damip Inatsisartuni amerlanerussuteqartut inatsisartunut piukkunnartutut nalilissagaanni ilimaginagu tunuarpoq.

Taamaammat taassuma parteeqataa Karl Tobiassen taanna taarserlugu iserpoq.

Siumumit Inatsisartunut ilaasortat assingi aqqilu uani takukkit.

Misilittagaqarluartut misilittagakitsunut ikiuisariaqartut

Nikisiternerilli kikkut issianerannut nunatsinnilu inatsisiliortuunerannut qanoq isumaqarpat?

Misilittagaqannginneq unammillernartuusinnaasoq, Birger Popplel nassuiaavoq.

Taassuma Inatsisartuni ilaasortat maannakkut issiasut qimerluupallallugit Inatsisartuniittut pingajorarterutingajaat nunatta politikkianut tunngatillugu misilittagakinnerusutut nalilerpai. 

Upernaakkut ataatsimiinneq ukiakkullu ataatsimiinneq

 

Inatsisartut ukiumut minnerpaamik marloriarlutik ileqquusumik ataatsimiittarput, tassa upernaakkut ataatsimiinneq aamma ukiakkut ataatsimiinneq.

 

Politikerit ataatsimiinnermi ilaatigut oqallittarlutillu inatsisit nutaat aalajangertarpaat.

 

Ataatsimiinneq nalinginnaasumik qaammatinik marlunnik pingasunilluunniit sivisussuseqartarpoq.

 

Immikkut ittumik pisoqarnerani pisariaqartinneqarpat Inatsisartut immikkut ittumik ataatsimiigiaqquneqarsinnaapput.

 

Ataatsimiinnerup avataani piffissaq politikkikkut sulinermut ataatsimiinnissamullu piareersarnermut atorneqartarpoq.

 

Politikkikkut ataatsimiititaliani ukioq tamaat sulisoqartarpoq.
 

Paasissutissarsiffik: ina.gl

- Inatsisartuni ilaasortat pingajorarterutaasa misilittagakinnerat pissutigalugu ilaasortat allat ataatsimiititalianiittullu nutaanut sulinermik ilinniartitsillutillu ilisimasanik naammaginartunik tunniussuinissaannut suliassarujussuaqartarpoq, Birger Poppel oqarpoq, nangillunilu:

- Taamaattoqanngippat tusarsimasat imaluunniit partiit iliuuserisimasaat malillugit taasiinnartarput.

Arnat pissaaneqarnerusut

Politikkikkut allami pingaarutilimmik aamma nikittoqarpoq.

Suiaassutsimmi agguataarnerat Inatsisartuni Naalakkersuisunilu aamma allanngorput.

Upernaaq qinersisoqarnerani arnaq qulit angutillu 21-t qinigaapput. Maanna arnat aqqaneq-marluupput angutillu 19-iullutik. Inuit Ataqatigiinnit arnat amerlanerussuteqarput.

Inuit Ataqatigiinnit arnat arfineq-marluk angutillu tallimat ilaasortaapput.

- Allannguutimininnguuvoq. Ataatsimulli isigalugu angutit arnallu assigiinngitsuniit assigiingitsunik misilittakkanik nassartartut oqarusuppunga. Taamaanneralu peqqissuunermut ersiutaasutut isigaara, Birger Poppel oqarpoq.

Naleqqamilu qinersinermi angutinik sisamanik qinigaasoqarfimmi allannguinermi naligiittoqarnerulerpoq.

Siullermik Kirsten L. Fencker avataanit peqqissutsimut naalakkersuisunngortinneqarpoq.

Tamatuma saniatigut Paneeraq Olsen Pele Brobergip Naalakkersuisuniilernerani Inatsisartuni issiavianiilerpoq.

Paneeraq Olsen sapaatip akunnerani matumani meeqqanut inuusuttunullu naalakkersuisutut toqqarneqarpoq, taassuma Eqaluk Høegh paarlappaa.

Taamaalilluni Naalakkersuisuni arnat angutillu maanna amerlaqatigiilerput.

Naalakkersuisuni ilaasortat aqqi assingilu uani takukkit.

Tunumit ilaasortat amerlanerusut

Naleqqap Paneeraq Olsenimut Inatsisartuni paarlaasua aamma arnaavoq, taanna Mette Arqe-Hammekenimik ateqarpoq.

Mette Arqe-Hammeken Ittoqqortoormiini najugaqarpoq, taassumalu atuutilerneratigut Ittoqqortoormiinit Inatsisartuni marlunnik ilaasortaqalerpoq. Taassuma aappaa tassaavoq Inuit Ataqatigiinnit Charlotte Pike.

Taarseraannerit qinikkat 31-t nunatsinni suminngaanneernerannut taamaalillutik sunniuteqarput.

- Inatsisartut assigiinngiiaarnerulerput, taakkua assigiinngiiaanerusunik misilittagaqarput, oqallinnerullu assigiinngiiaartumik tunuliaqutitaqarnissaanut tapertaasinnaanissaat neriunarluni, Birger Poppel oqarpoq.

Naleqqap Inatsisartunut ilaasortaatitaata aqqi assingilu uani takukkit

Taamaalilluta Inatsisartuni isertut anisullu naammassivagut.

Demokraatimmi Atassullu?

Partiit marluk minnerpaat upernaaq qinersisoqarnerani isertut suli taakkuupput.

Demokraatinit Inatsisartunut ilaasortat uani Atassummiillu uani takukkit.

KNR.gl-imi isummersorfik teknikkikkut ajutooqqavoq. Ajoqutaa misissorparput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl