Kalaallit Nunaanni Timersoqatigiit Kattuffiata timersornermi atisanik tuniniaasartoq NIKE isumaqatigiissuteqarfigaa.
Nunatta unammisartuisa atisartaatik NIKE-meersut Qeqertaaqqat unammiuaarneranni, Rhodos-imi aappaagu juuni 2007-imi pisussami, atoqqaassavaat,
Timersoqatigiit Kattuffiata siulittaasua, Nuka Kleemann oqarpoq, nunarsuarmi timersornermi atisanik tuniniaasartumik tusaamasaasumik namminneq aatsaat toqqaannartumik isumaqatigiissuteqarlutik.
Sunngiffimmi atisat, unammersuarnerit aallartinnerini isaanermi atisat, atisat timersuutit, tujuuluaqqat assigisaallu, inunnut 100-nut naammattut, Qeqertaaqqat unammiuaarneranni, aamma inunnut 160-inut naammattut, Issittumi nunallit unammiuaaqatigiinneranni NIKE-mit tunissutigineqassapput.
Isumaqatigiissuteqarnissamik aqqutissiuisuuvoq arpattartoq Kim Godtfredsen.
Isumaqatigiissutip Københavnimi atsioqatigiissutigineratigut, Kalaallit Nunaanni Timersoqatigiit Kattuffiata, NIKE-p, atisatigut tapersersugai allat uku peqatigineqalerput:
Golfertartoq Tiger Woods, arpattartut arlallit, aamma arsaattartoqatigiit tusaamasat, soorlu Barcelona aamma Brasiliap nunanut allanut unammisartui.
Timersoqatigiit Kattuffiata NIKE-mik isumaqatigiissutaa Issittumi nunallit 2008-imi unammiuaaqatigiinnerat ilanngullugu atuutissaaq.