Niisat 90-it missaanniittut misissuinermut nutaamut ilaatillugit pilanneqarput
Inernerit siulliit takkukkiartuaalerput.
Niisa nalinginnaasumik taama nipiliortarpoq, 89-illi allat taamaaliorsinnaajunnarsimallutik, tassami Pinngortitaleriffiup qanoq niisaqartigineranik misissuinini aallartimmagu, taamaaliorniarlunilu niisat 100-ngajaat pilannerisigut ilisimatusarfiginiarlugit. Ilisimatuup Mads Peter Heide Jørgensenip misissuinermi siuttuusup ilaatigut paaserusuppaa niisat piaqqiulersinnaanissaminni qanoq utoqqaassuseqartarnersut, qaqugukkut qassinillu piaqqisarnersut tamannaluunniit allanngortarnersoq. Pissutaasut aappaat tassa niisat maannakkorpiaq Kitaani pinngortitap allanngoriartorneranik malinnaasillugit atorniaratsigik. Tupaallaatigineqarsinnaasutullu niisat imaani uumasut ilaannik allarluinnarnik aqajarormioqarmata.
- Paasinarsivormi saarullinnik nerisaqartartut, tassami 1994-imi kingullermik misissuisoqarnerani akerlerluinnaanik saarullinnik aqajarormioqanngivimmata, taavalu aamma oqaatigissavarput avannarparnerusalersimagunartut, misiligutissavummi tamaasa maannakkut Maniitsumi katersorpavut siornatigullu Paamiuni Nuummilu katersorsimallugit. Tamanna silap allanngoriartorneranik pissuteqassagunarpoq niisat sinerissami imaani nillernerusumi ammassannik puallarsertarsimappata.
Niisat 89-it immaqa amerlaginassagaluartut taakkua ukiumut pisarineqartartunut 3000-inut naleqqiullugit suunngillat. Niisanik kisitsinerit kingulliit 2007-imi ingerlanneqarput, tamatumanilu niisat 30 aamma 35.000-it missaanniillutik, taamaattumillu amerlassusiat Mads Peter Heide Jørgensenip isumakuluutiginngilaa.
Pinngortitaleriffimmilu niiisat neqaat laboratooriani assigiinngitsuni Spaniami, Tysklandimi, Norgemi Danmarkimilu atorneqassapput, sinnerilu Pinngortitaleriffimmi nerineqassallutik.
Taama Mads Peter Heide Jørgensen oqarpoq, taassumalu naatsorsuutigaa misissuinerup inerneri ukiup missaa missiliorlugu qaangiuppat naammassineqassasut.
Aqagulu unnuk kulturisiorfimmi niisat marluk pilanneqassapput ilaatigullu aqajaruisa imaat misissorneqassallutik.
