Niisarpassuit qassutinut napitillutik toqusarput

Niisarpassuit, arferillumi allat, tusindtilikkaat Danmarkip imartaani qassutinut napitillutik ukiut tamaasa toqusarput – immaqalu taama toqusartuni nunarsuatsinni amerlanersaapput. Arferillu ikiliartulernerat maanna malunniuttoq, aviisimi Politikenimi allaaserineqarpoq.
maajip 10-at 2008 13:26

Niisat toqungasut 3.000-t 10.000-llu akornanni pallillugit amerlatigisut ipillutik toqusartut naatsorsuutigineqarpoq. Assersuusiussagutta, Amerikap kangimut sineriaani tamarmi niisat 1.000-t qassutinut napitillutik toqusarput.

-Kisitsisit taakku ilumoorpata, oqarsinnaagunarpugut Danmark tassaasoq arfeqarfinni anginerpaajusoq, tassami japanimiunit, norgemiunit allanillu arfanniartartunit amerlanerpaanik pisaqartarpugut, Danmarkimi Avatangiisit Pillugit Misissuisitsisarfimmeersoq, ilisimatooq, Jonas Teilmann, oqarpoq.

Saniatigut pisat taama amerlatiginerannut pissutaavoq, Europap avannarpasissuani Danmark tassaammat qassusersorluni aalisarfiunerpaaq. Saniatiguilli pisat aalisartut qaqqaqqalaarutigineq ajorpaat, ilaannilumi nassaarineqartarput niisat aqajaat ammaannarneqarsimasut, taamaaligunimmi kivissapput, nunamut tipinatik.

-Imaassinnaavoq niisat sissamut tipillutik nalukkianut akornutaanissaat pinngitsoorniarlugu naavi sipisaraat, kisianni aamma imaassinnaavoq, aalisartut aviisitigut ajortumik eqqartorneqarusunnatik taamaaliortartut, Jonas Teilmann oqarpoq.

Arfernik mikisunik saniatigut pisaqartarneq annikillisinniarlugu Inuussutissaqarnermut ministereqarfik 1,7 millioni koruuninik immikkoortitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq