Niels Thomsenip qinigaanissaa ilimanarpoq
Inummut ataatsimut qinersinerit kisiisa aallaavigigaanni Demokraatineersoq Niels Thomsen nunarput sinnerlugu Folketingimut qinigaanissamut ilimanarnerpaavoq.
Qinersinermi kingullermi Niels Thomsen 762-init qinerneqarpoq.
Taassuma tullersortigaa Doris Jakobsen, Siumut, Inatsisartunut 2009-mi qinersinermi 370-init qinerneqarpoq.
IA-nngorlaaq Nikoline Ziemer 362-nit qinerneqarpoq, taamanili Sorlaat Partiianni siulittaasutut qinigassanngortilluni.
Akitsinnguaq Olsen Siumut sinnerlugit Folketingimut qinigassanngortittoq, 2009-mi Inatsisartunut qinersinermi 112-init qinerneqarpoq, taamanili IA-mit qinigassanngortilluni.
Kiisalu IA-mit Kaali Olsen 70-init qinerneqarpoq, Demokraatiniillu Michael Rosing 57-init qinerneqarluni.
Qinigassanngortittut sinneri, IA-mit Sara Olsvig, Sofia Rossen Johan Lund Olsenilu, Demokraatiniit Ane Lone Bagger Aviaaja Karlshøj Poulsenilu Siumumiillu Nick Nielsen Vittus Qujaukitsorlu Inatsisartunut qinersisoqarmat kingullermi qinigassanngortinngillat, qanorlu Folketingimut qinigaasinnaanerat ilimanartiginersoq siunissap takutikkumaarpaa.
Atassummiit qinigassanngortittussat qanoq inissisimajumaarnissat suli nalunarpoq suli qinigassanngortittut saqqummiunneqanngimmata. Qinigassanngortittussalli kikkuugaluarunilluunniit Inatsisartunut qinersinermi kingullermi Atassummiit qinigaasut arlaannaalluunniit Niels Thomsenitulli qinerneqartigisimanngillat.
Folketingimut qinersinermi kingullermi, 2007-imi, IA Siumumit qinigaanerulaarpoq. Partiit taakku marluk qinersisut pingasorarterutaannit qinerneqarsimapput. Demokraatit Atassullu aamma assigiipajaamik qinerneqarsimapput, qinersisut 16 procentiinit 18 procentiinillu qinerneqaramik.
