Niels Thomsen: Sulisut pillugit ajornartorsiutit oqallisigineqartariaqarput

Suliffeqarfinni allani tamanna aamma ajornartorsiutaanersoq, Niels Thomsenip ilisimannginnerarpaa, ajornartorsiutilli oqallissaanerunissaa ujartorlugu:

- Toqqaannartumik oqaatigiuminaappoq, kisianni sulisitsisut allat ajornartorsiummik taassuminnga pigisaqarnertik piffissami uani aamma siusinnerusukkut uannut apuutillattaarpaat, namminerlu uggorilaarpara pisortatigoortumik sammineqanngitsoq, Halibut Greenlandip pisortaa Niels Thomsen oqarpoq.

Aalisakkerivimmi sulisut sapaatip-akunnerisa naanerini tulleriinni ajornartorsiutigisimallugit, aviisimit Informationimit oqaloqatigineqarnermi nalaani oqaatigaa.

Ajornartorsiulli siunissaq qaninnerusoq eqqarsaatigalugu imaaliallaannarlugu aaqqiivigineqarsinnaanissaa ajornakusuussasoq, aamma oqaatigaa. Halibut Greenlandimi sulisut suliaminnik paarsilluartut sulisoriinnarnissaat, ilaatigullu amerlinissaat pillugu ukiup ingerlanerani assigiinngitsunik iliuuseqarpoq, piffissami ulapaarfiunngitsumi sapinngisamik sulisoqarsinnaanissaa anguniarneqarsimalluni, soorlu aamma pikkorissartitsinerit assigiinngitsut periarfissaasimasut.

Pikkorissartitsinerit suliamut tunnganerusarput, inuttulli ineriartornissaq ilaatigut pisariaqarsinnaasoq, Niels Thomsenip oqaatigaa:

- Inuttut ineriartornissaq ilaatigut immaqa pisariaqarsinnaavoq, soorlu aalisakkerivimmi sulinissamut piumasaqaatit annertoorujussuartut taaneqarsinnaanngillat. Tassa piffissaq eqqorlugu takkussinnaaneq, taava sulinerminut tunniusimalluni sulisinnaaneq, taava sinneri ilikkarneqarsinnaasuupput ajornanngittunnguamik, Niels Thomsen oqarpoq.

Oqartussat peqatigalugit sulisunik ineriartortsisoqarnissaa, taassuma takorloorpaa, sulisut inortuikulasut, allatigulluunniit suliaminnik paarsilluanngitsut inuttut ineriartorsinnaanissaat taamaaliornikkut anguneqarsinnaasoralugu.

Ilaasortamik sulinerminnik paarsilluanngitsuunerarneqarnerat, SIP Ilulissani siulittaasup Abraham Andersenip ilumuunnginnerarpaa, Niels Thomsen ilaatigut sakkortuallaamik oqaaseqarnerarlugu, pissutsilli iluamik suli iserfigisimannginnamigit maannakkuugallartoq annerusumik oqaaseqarusunnginnerarpoq.