Niels Thomsen Sulisitsisut Kattuffiannit GA-mit nersorneqarpoq

Ingerlatsinermik instituttimit kandidatinngortoq Niels Thomsen Sulisitsisut Kattuffiannit 5.000 koruuninik aningaasartalinnik nersornaaserneqarpoq. -Sulisitsisut Kattuffianni GA-mi ilisimavarput, namminersortut pisortallu suliffiutaanni ilittut piginnaasallit pisariaqartinneqartut, maligassiuisussatullu pisariaqartinneqarputit. Ingerlalluarnissannillu kissaappatsigit. Sulisitsisutut nersornaaserusuppatsigit, Sulisitsisut Kattuffiat, GA, sinnerlugu Mogens Søgaard Larsen oqalugiarnermini ilaatigut oqarpoq.
Allattoq Oline I. Olsen
februaarip 27-at 2009 15:36

Nersornaaserneqartoq Niels Thomsen tuppalleqaaq.

- Ukiuni kingullerni suliarisimasat arlaatigut akuerineqarneratut misigisimavara, Niels Thomsen oqarpoq. Taanna ingerlatsinermik instituttimi kandidatinngorniarnermini specialiliaata qulequtaraa ”Kalaallit Nunaanni inuiaqatigiit aaqqissuussaanerat nunami namminermi aamma nunarsuarmioqatigiinnit isigalugu”. Tassani aningaasatigut ineriartornissamut aqqutissat Niels Thomsenip taakkartorpai.

- Soorlu assersuutigalugu qanittukkut namminersorneq pillugu qinersisoqarmat eqqartorneqarpoq, aningaasatigut imminut napatilernissaq qitiusoq. Taava piviusunngortissagutsigu siammasissumik najugaqarnerput taavalu najugaqarfiit amerlasuut inukittuusut kiffartuussinerlu taakkununnga, assigiisitsiniarneq aallaaviulluni akisoorujussuuvoq, Niels Thomsen oqarpoq. Inuiaqatigiillu taamatut aaqqissuussaanerat peqqutaalluni aningaasaqarnikkut napatilernissaq apeqquserpaa.

- Aningaasatigut imminut napativinneq aallaaviussappat, illoqarfiit, najugaqarfiit angisuut, kisianni inuussutissasiornikkut periarfissarissaarfiusut taakku suliama inernerivai, Niels Thomsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq