Assi: Niels Thomsen

Niels Thomsen qinigaanermini maniguuttoq - pisortaaginnassaaq

Partiit qinigaanerpaat pingajuanni, tassa Demokraatini, taaguunneqarnerpaap Niels Thomsenip Inatsisartuni sulilernissani piareersimaffigaa.

Qinersinerup inernerata takutippaa Demokraatit 5.173-inik taaguunneqartut.

Niels Thomsen 2.710-nik taaguunneqarluni Demokraatini taaguunneqarnerpaavoq.

Maniguuteqaluni, Niels Thomsen oqarpoq:

- Ippassaq paasinarsiartulermat misigissutsit eqqumiitsut, ulluinnarsiutaavallaanngitsut, takkussuupput. Maniguunneq annertooq, sulerusunneq annertooq, taamatut eqikkarneqarsinnaasut. Inuppassuit partiitsinnut tularariartorput aamma taanna partiitsinnut annertuumik pisussaaffiliivoq, Niels Thomsen, nunatsinni taaguunneqarnerpaamit Sara Olsvigimit 650-inik ikinnerusunik taaguunneqarluni, qinerneqarnerpaat aappaattut inissippoq.

AAMMA ATUARUK Her er valgets vindere og tabere

Qinigaalluarninilu ilaatigut ima tunngavilersorpaa:

- Qineqqusaarnermi pissuserisara, soorlu realpolitikkerusullunga, tassa ajornartorsiutit piviusut piviusumik aallaaveqarlunga samminiarsarisimavakka pisariaqarsorigakku. Taavalu ineriartortitsinerup tungaatigut periarfissarpassuagut puigorneqannginnissaat, taakkumi oqimaaqatigiittariaqaramik, Niels Thomsen Halibut Greenlandimi pisortaavoq, tamatumalu saniatigut Inatsisartuni  sulerusuppoq:

- Atorfiga assut nuannarivara aamma Inatsisartuni massakkut ilaasortanngorpunga. Taakku ataatsimoortillugit ingerlatissavakka, pilersaarutiginngilara atorfiga iperassallugu. Tamakku ammasumik nalunaarutigisarnikuuakka aamma sulinikkaajugama taavalu suleqatikkalu assigiinngitsutigut aaqqissuussinikuugatta, qularinngilara tamarmik naammassilluassallugit aamma taanna qinersisartunit ippinnartutut malugineqarnavianngilaq, Demokraatineersoq Niels Thomsen Nunatta Nipaanut taama oqarpoq.

AAMMA ATUARUK Partiinut tamanut ammavunga

Isummersuutit