Niels Platou toquvoq

aggustip 11-at 2005 16:18

Palasi soraarneq Niels Platou, Nuuk, sapaatiummat aggustip arfineq-aappaani toquvoq 78-inik ukioqarluni.

Niels Platou Napasormiuuvoq, Nuummilu Ilinniarfissuarmi atuareerluni 1952-imi ajoqinngorpoq. Nunaqarfippassuit, pingaartumik Qeqertarsuup Tunuani ajoqiuffigisimavai, kiisalu Tunumi Kulusumi ajoqiusimalluni. 1979-imi palasinngortinneqarpoq, palasiuffigisimavaalu Upernavik, Ammassalik, Alluitsup Paa aamma Qasigiannguit. 1992-imi soraarninngoraluarluni palasitut suliinnarpoq, illoqarfinni assigiinngitsuni taartaasarluni.

Nuummiilernermi palasitut taartaasarnermi saniatigut KNR-imi biibilimit eqqarsaatissiisarportaaq.

Niels Platou nunatsinni nunattalu avataani ilisarisimaneqarluarpoq Erik Ballingip 1956-imi filmiliaani ”Qivittoq”-mi inuttaagami, ilaatigut danski isiginnaartitsisartoq Poul Richardt pingaarnertut inuttaaqatigalugu. Filmi ”Qivittoq” Oscarimik nersornaaserneqartussatut taamani inassutigineqartut ilagaat.

Niels Platou atuakkiortutut nunatsinni aamma ilisimaneqarpoq, saqqummersissimasaasalu ilagaat: Amitsuarsummi, Inuusunnermi misigisat, Suilaaqqut kiisalu Napasoq – 1865-1990.

Niels Platou aqagu aggustip 12-iani nalunaaqutaq ataatsimut Hans Egedep Oqaluffianit ilisaassaaq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk