Niels Pedersen: Sanasut suliffitsik qimaleraangamikku atortutik qajannaartariaqarpaat

Nuup ilaani Qinngutsinni sanaartugarpassuit anorersuartillugu inuunermik navianartorsiortitsisinnaapput.

Tamanna ilaqutariit Pedersenikkut uppernarsarsinnaavaat. Sisamanngornikkut ullaakkut anorersualeruttormat napparut sinittarfiannut kappuppoq, Sermitsiami taama allaaserinnittoqarpoq.

- Qanngorujussuarpoq, soorlu qoorortuumik igeriarnertut qaartartulluunniit qaarneratut. Inimi katersuussimavugut anorlerpallaaqimmammi, eqqarsaatigiuarparalu napparutip inip igalaava eqqorsimagaluarpagu qanoq pisoqarsimassagaluarnersoq. Annilaarnaqaaq tamannalu meeqqannut toqqissisimananngilaq, Niels Pedersen oqaluttuarpoq.

Sanaartortut sanaartorfitsik qimaleraangamikku atortuminnik qajannaarsuisannginnerat Niels Pedersenip paasinngilaa.

- Uanga nammineq suliffiga qimalersinnagu atortut iluarsaattarpakka, Niels Pedersen oqarpoq.

Ilaqutariit allat biiliat tulleqqanit sanasut atugaannit aserorneqarsimavoq.

- Biilit matuat meeqqat atortagaat eqqorneqarpoq, Tanja Andreassen sisamanik meeralik oqarpoq.