Nickip ujarneqarnera unitsiinnarpaat
19-inik ukiulik sapaatip akunnerata matuma siorna Narsamit umiatsiamik aallarpoq, taamanimiillu takoqqinneqarani. Illoqarfimmiut namminneq kajumissutsiminnik peqataasut peqatigalugit Issittumi sakkutooqarfiup sinerissamik alapernaarsuutaa Vædderen ilaatigut qulimiguulini atorlugu aamma politiit angallataat Sisak III peqatigalugu Nick Duus Hansenimik ujaasigaluarput, oqartussalli ujaasinertik tassa maanna taamaatiinnarpaat. Illoqarfimmiulli arlallit ujaasiinnarallarniarlutik aalajangersimapput.
Angummut inuusuttumut umiatsiamullu paasissutaasinnaasut kingulliit tassaapput, Nick Duus Hansenip tammaaneqalernerata kingorna ullup ataatsip missaa qaangiuttoq arnap Arsummiup angut ilisarisimanngisani orsersortoq takusimammagu. Ullaap tungaani qulit missaanni angut avannamut aallartoq takusimanerarpaa.
Umiatsiaq kinngusimassagaluarpat, umiatsiami pigineqartut makkua umiatsiamiissimasinnaasut, immamilu puttasinnaasut ungasiartumit takuneqarsinnaasut maluginiarneqarsinnaapput:
- Benziinamut dunkit 20 liiterit sungaartut marluk.
- Attuussaarnaveeqqutit tungujortut marluk.
- Attuussaarnaveeqqutit qaqortut marluk.
- Puttaqutit avalatsitsisarfiit sungaartut aappaluaartut qaqortullu.
- Atallaat annanniutit qasertut marluk tuimikkut sungaartunik aappaluaartortallit.
- Akisaasat allallit tungujortut taartut.
- Iputit marluk, nissik aamma benziinamut dunke 10 liiteri qernertoq aappaluttumik similik.
Politiit taama paasissutissiinermikkut neriuutigaat, namminneq kajumissutsiminnik ujaasisut Nick Duus Hansenimik ujaasinertik nangissinnaassagaat, paasissutissanillu politiinut oqarasuaatikkut 70 11 24-mut tunniussisinnaallutik.
Nittartakkami Sermitsiaq.AG-mi aamma oqaatigineqarpoq, arnat sisamat Edda Lyberth siuttoralugu namminneq kajumissutsiminnik ujaasisut benzinamut aningaasartuutaannik matussutissanik aningaasanik katersuinialersimasut.
