Nick: Sumiluunniit qanoq allaaserinninnissannut pisinnaatitaaffeqarpunga

Naalakkersuisunut ilaasortaq, Nick Nielsen radioaviisimi ilanngutassiatsinni taaneqartut ilaat aperigatsinni, Jens B. Frederiksenip isummersuutaanut qanoq isumaqarnersoq, Nick Nielsen siullermik akivoq, Jens B. Frederiksenip pisut assigiinngitsut paatsoorsimagai.

Demokraatit siulittaasuata ulloqeqqanut radioaviisimi ilaatigut oqaatigaa, Naalakkersuisunut qinikkatut sulinermut misilittagakitut, Steen Lynge aamma Nick Nielsen, suliaminnut atatillugu tusagassiortunit apersorneqartarnerminni eqqunngitsumik pineqarsorigaagamik narrujuummiasuusut. Taamaattumik Jens B. Fredriksen isumaqarpoq, politikerisut sulinermi tusagassiortunit isornarsinnaasunik aperineqarnermi taakku pitsaasumik akisarnissaat ilikkarneqartariaqartoq.

Tamatumunnga Nick Nielsen ima akivoq.

- Jens B. Frederiksenip oqarnera isumaqatigaara tassa tusagassiortut isornartorsiutinik apeqqari tigusinnaasariaqarivut, tassa taamaasiortarpugut.

Naalakkersuisunut ilaasortaq taama oqarpoq nangillunilu oqaatigalugu, politikerit isummaminnik sukkulluunniit annissuinissaminnut pisinnaatitaaffeqartariaqarmata.

- Isumaqarpunga politikerit inuillu kikkuugaluartulluunniit pisinnaatitaaffeqartut sumiluunniit allaaserisaqarnissaminnut aamma eqqortumik pineqarsorinngikkunik soorunami tamanna sumiluunniit allaaserisinnaavaat.

Naalakkersuisunut ilaasortaq, Nick Nielsen taama oqarpoq.

Jens B. Frederiksenip radioaviisimit ullumi apersorneqarnermini, Naalakkersuisunut ilaasortaq alla taasaa tassaavoq, Steen Lynge. Taassuma oqaatigaa, Jens B. Frederiksenip isummersuutai isumaqatigalugit, kisianni nammineq soorlu Facebook atorlugu isornartorsiuineq ajorami tamanna annerusumik oqaaseqarfigisinnaanagu oqaatigalugu.

Naalakkersuisut siulittaasuat, Aleqa Hammond oqarpoq, kikkulluuniit politikeriugunik allamilluunniit suliaqarunik pisinnaatitaaffeqarmata nittartakkat suulluunniit atorlugit isummaminnik annisuinissaminnik.

- Nuna manna demokratiskiusumik ingerlaffiuvoq nunalu manna kikkut tamarmik qanoq oqaaseqarsinnaatitaanerannik ataqqinnittuuvoq taamaattumik politikerit politikeriunngitsulluunniit qanoq oqaaseqartarneri maani nunami taama pisinnaatitaaffeqarneri ataqqineqassaaq.

Naalakkersuisut siulittaasuat, Aleqa Hammond taama oqarpoq.

Jens B. Frederiksenip tusagassiutinut nalunaarummini aamma radioaviisimit apersorneqarnermini ateq alla taasaa tassaavoq, Per Berthelsen. Taanna radioaviisimit oqaaseqartinniaraluarparput taamaaliorusunnanili taanna oqarpoq.