Kalaallip qaqqasiortup, Nick Nielsenip, qaqqasioqatimilu Jacob Wetche-p, K2-mik qaqisiniaraluarnertik sapaatip akunnerata ataatsip matuma siorna taamaatiinnarpaat.
Ajunaartunut qulingiluaagallartutut ilisimaneqartunut ilaavoq norgemiu Rolf Bae, taassuma ajunaarnera nuliata isigaa. Rolf Bae-p Nick Nielsenillu toqqi K2-mi tammaarsimaarfimmi sapaatip akunnerani kingullermi sanileriissimapput.
-Uppernanngingajapporluunniit asasakka peqqillunga maanna najorakkit, qaqqasioqatikka ajungitsut, ullualunnguit matuma siorna ilagisakka, maanna toqukkut qimaguttut paasillugu tupannaqaaq, Nick Nielsen aviisimut BT-mut oqarpoq.
K2-mi ujaqqat sisoorujussuarmata Nick Nielsenip qaqqasioqataatalu Jakob Wetche-p qaqisiniarnertik taamaatiinnarniarlugu aalajangerput.
K2, Pakistanimiittoq, nunarsuarmi qaqqat navianarnersaattut qaqqasiortut akornanni naatsorsuutigineqartarpoq. K2-mik qaqisiniartut sisamaagaangata ataaseq ajunaarsinnaasarpoq.
Nick Nielsenilli K2-mik qaqisinissaminik nukappiaraagallaramili pilerigisani suli taamaatinngilaa. –Ukiut qulit qaangiuppata misileeqqinniarpunga, Nick Nielsen aviisimit BT-mit apersorneqartilluni oqarpoq.