Nick Nielsen: Oqallinnissamut inissaqartariaqarpoq

- Meeqqat atuarfiat nunatsinni nunanilu allani oqallisigineqartuaannarnikuuvoq aamma taamaattuassaaq, Nick Nielsen erseqqissaavoq.

Inatsisartuni ilaasortaq Demokraatineersoq Anda Uldum ippassaq oqarpoq meeqqat atuarfiat pitsaanngippallaarnerarlugu atuartullu pikkorlunnerarlugit ukiuni arlalinngortuni oqartarneq unitsillugu angajoqqaat akisussaaffimmik tigusillutik iliuuseqartariaqalersut.

Ilinniartitaanermut Naalakkersuisoq oqarpoq atuarfeqarfinnut angalasarnermini paasisimallugu atuarfiit suliniuteqarnerannik angusaannillu nersortariaqartut aammali atuarfeqartoq pitsanngoriartortunik atuarfiillu ilaanni suleqatigiinnerup angajoqqaanillu suleqateqarnerup ingerlalluannginnera peqqutigalugu pitsanngorsartariaqartunik.

Aamma erseqqissaavoq Naalakkersuisut kommuneqarfiit kattuffiat KANUKOKA aamma ilinniartitsisut kattuffiat IMAK suleqatigalugit Naalakkersuisut ilinniartitsinermut pilersaarut II-mik taaguutilimmik siunnersuuteqartut. Tassani angajoqqaanik qanimut suleqateqarnissaq siunnersuutigineqarluni.

Ilinniartitaanermut Naalakkersuisup Nick Nielsenip Inatsisartuni ilaasortaq aamma Kommuneqarfik Sermersuumi meeqqanut, ilaqutariinnut atuarfeqarnermullu ataatsimiititaliami siulittaasoq Anda Uldum inappaa Kommuneqarfik Sermersuumi atuarfiit pulaaqqullugit, taamaalilluni atuarfiit ilinniartitsisullu atugarisaat nammineerluni paasisaqarfiginiassagamigit.