Nick Nielsen: Illoqarfiit ilaat unittooqasut ineriartortittariaqarpavut
- Nunatta siammasissumik ineriartortinneqarsinnaaneranik Naalakkersuisuini isummersornitsinni, borgmesterip isummersornera uangut pilersaarutitsinnut tulluuppoq.
Niuernermik Ilinniarfiup Nuummiittup Qaqortumut nuunneqassanersoq, radioaviisimit Nick Nielsen aperigatsinni, Ilinniartitaanermut Naalakkersuisoq ima akivoq.
- Taama toqqaannartigisumik Naalakkersuisutut isummersorusunngilanga. Pingaartipparali atuisut soorlu, siulersuisut atuarfimmillu ingerlatsisut qanimut suleqatigerusuppakka, eqqarsaat qanoq iliuuseqarfiginnginnarani, Nick Nielsen akivoq.
Niuernermik Ilinniarfiit siulersuisuini siulittaasup, Bjørn Holmip Qanoruumut oktobarip aqqarnganni oqaatigaa, niuernermik ilinniarfiit ataatsimoortinneqarnissaat isumaqatiginagu oqarluni ilinniarfiit siunertaat assigiinngitsuuneri iluatigineqartariaqartoq.
- Qaqortumi Niuernermut Ilinniarfiup pikkoriffigaat, pisiniarfinni sulisussanik ilinniartitsineq Nuummi pikkoriffigineqarlutik ilinniarfinnut ingerlaqqiffiusussanut ilinniartitsineq.
Niuernermik Ilinniarfiit siulersuisuini siulittaasup Bjørn Holmip taama oqarnera, Ilinniartitaanermut Naalakkersuisup ima oqaaseqarfigaa.
- Tamassuma annilaanngatigineqarnera paasisinnaalluarpara. Naalakkersuisut taama siunnerfeqarneranni eqqarsaatigilluarsimavarput, nuutsitsiniarneq qanoq akeqassanersoq, atuartunut qanoq kinguneqassanersoq assigisaallu eqqarsaatersuutigalutigit, Nick Nielsen oqarpoq.
Nnuummiit ilinniarfiit illoqarfinnut allanut nuutsikkiartuaarneqarneranni suna siunertaanersoq, Ilinniartitaanermut Naalakkersuisumut apeqqutigigatsigu, taanna ima akivoq.
- Nuummi ineriartorneq ingerlajuaannarpoq. Sineriammili piffiit ilaanni ineriartorneq unitsinneqartarpoq, tassa tamanna ajornartorsiut. illoqarfinni allani periarfissaqarluarpoq ineriartorsiusinnaasunik, tamannalu politikkikkut eqqumaffigaarput.
Ilinniartitaanermut Naalakkersuisoq, Nick Nielsen taama oqarpoq.