Nick N: Ilinniartut inissarsiuunnissaat Nuup nammineerluni isumagissivaa

Kommuneqarfik Sermersuumi borgmesterip Asii Chemnitz Narupip, IA, Nuummi ilinniartut minitaasarsorai, kommunillu kisimiilluni ilinniartut inissaannik pissarsiniarnissaa naleqqussorinagu.

Illoqarfiit pingaarnersaanni arlallit oqaatigaat Nuummi pissutsit allaanerusut, ingerlaqqiffiusumik ilinniarfiit amerlanersaat Nuummiimmata.

Naalakkersuisulli Nick Nielsenip isornartorsiuisoqarnera paasisinnaannginnerarpaa malittarisassallu tamanut assigiitsuuneri naqissuserlugu.

- Kikkut tamarmik assigiimmik pineqarnissaat aallaaviussaaq. Sisimiuni innuttaasut Nuummi innuttaasut ajornartorsiutigisaasa assinginik aamma ajornartorsiuteqarput. Sisimiunimi innuttaasut pineqaraangata, ilinniartut inissarsiuunneqarnissaat kommunip isumagisussaavaa, ilinniartitaanermut, naligiissitaanermut, ilagiinnut kulturimullu naalakkersuisoq Nick Nielsen, S, taama oqarpoq.

Asii Chemnitz Narupip isornartorsiuinera aamma eqqumiigivaa.

- Taamatut ajornartorsiuteqarneq Kommuneqarfik Sermersuumut nutaajusinnaanngilaq.

Nuummi arlallit oqaatigaat, Nunatsinni ilisimatusarfik tassaniimmat nammatassat allaanerusut, nammatassanullu taakkununnga Namminersorlutik Oqartussat ikiuuttariaqartut.

Nick Nielsenilli tamanna isumaqatigivallaanngilaa.

- Sisimiuni aamma ilisimatusarfeqarpoq. Danmarks Tekniske Universitetip immikkoortortaa ingeniørinngorniarfiusoq tassaniippoq. Aamma Sisimiormiunik ilinniartoqarpoq, Ilulissani aamma taamaappoq, Nick Nielsen oqarpoq, taanna aamma oqaluttuarpoq Nuummi innuttaasut Nuup avataani ilinniassatillutik ilinniartut ineqarfiini inissamik tunineqartartut.

- Kikkut tamarmik assigiimmik pineqarput, naalakkersuisoq naqissusiivoq.

Tamatumunngali atatillugu aamma oqaatigineqartariaqarpoq Sisimiuni ilisimatusarfiup oqaatigimmagu Sisimiormiunik marluunngikkunik pingasunik ilinniartoqarluni, aammalu Ilulissani ilisimatusarfeqanngimmat.

Nick Nielsenilli naqissuserpaa kommunit oqaloqatigikutsoorsinnaallugit.

- Misissussavarput. Eqqumaffigaarput. Aamma sammisaq pillugu kommunit oqaloqatigerusuppakka, Nick Nielsen oqarpoq.

Nuummi innuttaasut ingerlaqqiffiusumik ilinniassagunik ilinniartullu ineqarfiini inissamik pissarsissagunik, taava Sisimiuni issittumi ingeniøritut ilinniartariaqarput imaluunniit nunatta avataanut ilinniariartorlutik.