Nick Hækkerup: Inuit eqqusseqqusinnginnermut ilaatinneqannginnerat Naalagaaffeqatigiinnut pingaaruteqarluinnarpoq
Danskit niuernermut europamullu tunngasunut ministeriata Nick Hækkerupip naggueqatigiit Inuit eqqusseqqusinnginnermut ilaatinneqannginnerat Naalagaaffeqatigiinnut pingaaruteqarluinnartuusoq Berlingske Tidendemut nassuerutigaa. WTO-lli aalajangiinera EU-mi inatsisiliornermut qanoq sunniuteqassanersoq maannangaaq oqaatigissallugu siusippallaartoq aamma erseqqissaatigaa, neriorsuutigaalu danskit naalakkersuisuisa Kalaallit Nunaata soqutigisai ilungersuutigissagaat.
- Naggueqatigiit Inuit puisittaannik nioqqutissiat siunissami EU-mi tuniniarneqarsinnaanissaat danskit naalakkersuisuisa Kalaallit Nunaat EU-Kommissionilu suleqatigalugit sulissutigissavaa, danskit niuernermut europamullu tunngasunut ministeriat Nick Hækkerup taama oqarpoq.
WTO-p aalajangiinera naapertorlugu EU-p eqqusseqqusinnginnera EU-llu inatsisiliornera WTO-p aalajangersagaanut naapertuutinngillat. Kalaallit Nunaat naggueqatigiit Inuit eqqusseqqusinnginnermut ilaatinneqannginnerinut peqataasinnaanissaa apriilip qaammataani akuerineqarpoq, Norgeli Canadalu taamatut immikkut pineqarsimanngimmata, WTO isumaqarpoq Kalaallit Nunaat immikkut pineqartoq. WTO-mit aamma erseqqissaatigineqarpoq Kalaallit Nunaanni puisinniarnerup affaa aningaasarsiutigalugu ingerlanneqartoq.