Nicholas Sarkozy-p naalakkersuisui ajugaapput

Frankrigimi Inatsisartunut aappassaanik qinersinermi præsidentinngorlaap Nicholas Sarkozy-p naalakkersuisui talerperliit ilimagineqareersutut ajugaapput. Naalakkersuisut Inatsisartuni amerlanerussuteqalerput, taamaattorli ilimagisatut annertutiginngitsumik.Partii naalakkersuisoqartitsisoq – UMP –kinguariarpoq, socialistit tupinnaannartumik siuariartut. Qinersinerup inernerata takutippaa præsident Sarkozy kinguarialaartoq, BBC-p Parisimi ilanngutassiortua allappoq.

Sarkozylli aaqqissuusseqqinniutiginiakkani eqqissilluni Inatsisartuni akuersissutigitissagai ilimanarpoq. Ilinniarnertuunngorniafiit nammineernerulernissaat Sarkozy-p neriorsuutigisimavaa, aamma pinerluttut sakkortunerusumik pillarneqartalissasut neriorsuutigisimallugu. Nunasiniat killilersugaassapput, akileraarutit appartinneqassapput sulinerlu nikerarnerulissalluni.

Qinersiartortukissimavorli, 60 procentiinnaasimallutik. Ippassarli qinersiartortut pissutigalugit Frankrigimi Inatsisartunut arnat isertut aatsaat taama am,erlatigaat. Kisitsineq suli naammassinngitsoq paasinarsivoq Inatsisartuni inissani 577-iusuni ikinnerpaamik 106-it arnaassasut. Tassa inissani 18 procenti, tamannalu siuariarnerujussuuvoq, maannami 13 procentiinnaammata.

Frankrigimi ukioq 2000-imi akuersissutigineqarpoq, arnat angutillu amerlaqatigiit partiini qinigassanngortittassasut. Partiilli angisuut peqqussut tamanna suli angunngilaat.