Nuummi Qapiarfiusaami eqqaavimmi amiilaarnartumik, tassa inuup niaquata saarnganik ippassaq nassaartoqarpoq.

Niaqqup saarnganik eqqaavimmi nassaartoqartoq: Ilivitoqqameerpoq

Nuummi Qapiarfiusaami eqqaavimmi amiilaarnartumik, tassa inuup niaquata saarnganik ippassaq nassaartoqarpoq. Pinerluttoqarsimaneranilli takussutissaqanngitsoq, politiit oqaatigaat.

Nuummi inuup niaquata saarnga Nuummi Qapiarfiusaami eqqaavimmi ippassaq nassaarineqarpoq.

Politiit KNR-imut taama paasissutissiipput.

Amiilaarnartumik nassaarneq politiit misissuiffigisimagitsik uppernarsarpaat, pinerluttoqarsimanngitsorli oqaatigalugu.

Inuup niaquata saarnga ilivitoqqameersuuvoq. Inummillu ilivitoqqamiit angerlaanneqarsimallunilu angerlarsimaffimminiitinneqarsimavoq.

Pineqartullu niaqqup saarnga igissimagaa, eqqaavimmi nalinginnaasumi ippassaq nassaarineqartoq, politiit oqaatigaat.

AAMMA ATUARUK Tunumi dinosaurersuarnik nassaartoqarpoq

- Aasat tamaasa aputaarunnerata kingorna ajoraluartumik inuit iliveqarfinni nassaartarput, taavalu ilaasa nassaatik angerlaattarlugit. Nassaap taanna aamma ilagigunarpaat, Nunatta Katersugaasiviani pisortaq, Hans Lange oqarpoq.

Inuup niaquata saarnga ippassaq nassaarineqartoq qatanngutigiinniat iliveqarfianiit nassaarineqarsimassasoq Nunatta Katersugaasivianit ilimagineqarpoq.

Qatanngutigiinniat iliveqarfiat 1733-imiit 1900-up tungaanut atorneqarpoq.

Nassaarineqartoq suneqassava?

- Nassaat katersugaasivimmit katersorneqartarput, sinerissamilu katersugaasiviit suleqatigalugit inuit saarngi katersorneqartarput. Katersorneqareeraangamik Danmarkimut nassiunneqartarput.

Danmarkimi suneqartaramik?

- Danmarkimi Panum-institutsimi taaneqartartumi inuit saarngi katersorneqarput. Nunatsinneersut saarngit aamma Panum-institutsimi katersugaapput, kisianni nunatta pigisarai.

Nassaarineqartoq qanoq pisoqaatiginersoq paasineqarpa?

Annerusumik misissuisoqartinnagu oqarsinnaanngilagut qanoq pisoqaatiginersoq.

Taamatut ilivitoqqaniit tigusisoqarsimanera qanoq oqaasissaqarfigaajuk? 

- Isumaqarpunga nassaat iliveqarfimminngaanneernerat inuit eqqarsaatigisariaqaraat.

- Inuit saarngi aamma ataqqinerusariaqaraat isumaqarpunga. Ukumi inuit toqunikut allatulli kristumiuupput. Kuisimasuupput. Kuisereernerup kingorna iliveqarfinnut aamma ilineqarnikuupput.

Taama nassaartoqaraangat susoqartarpa?

- Iliveqarfikuni immaqaluunniit illoqarfikuni assaaqqusaasoqanngilaq. Tamanna pillugu inatsiseqarpoq malittarisassaqarlunilu. Taamaammat assaasoqannginnissaa iliveqarfinnillu ataqqinnittoqarnissaa kaammattuutigerusuppara, Hans Lange oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat