Niaqornaneersoq 2.500 dollarinnappoq

Allattoq Najaaraq Egede
aggustip 30-at 2007 15:50

Aalisartoq kalaaleq Uummannameersoq NASCO-p 2007-mi Pinngortitaleriffimmut kapisillit nalunaaqqutserneqarsimasunik nassitsisimasut akornanni makitaavoq.

Karl Kristian Kruse Niaqornaneersoq NASCO-miit check-imik $ 2500-nik nalilimmik tunineqarpoq.

Kapisilik nalunaaqutserneqarsimasoq siorna aggusti 2006-mi USA-mi naalagaaffeeqqat ilaanni Mainemi, Penobscotip kuussuaneersoq pisarisimagamiuk.

NASCO (North Atlantic Salmon Conservation Organisation) kapisilinnik nalunaaqutsersuisarpoq, kapisilinnut ilisimatuussutsikkut nalunaaqutsersuutit pilertornerusumik pitsaanerusumillu utertinneqalertortarnissaat siunertaralugu. Kapisillit nalunaaqutserneqartarput atorluarneqarunerunissaat ingerlaartarfiilu paasisaqarfiginerujumallugit.

NASCO’p kommissioneqarfiini tamani ukiut tamaasa $ 1.500 dollarsinik akissarsititsisoqartarpoq, Amerikami Avannarlermi, Atlantikup imartaata Avannamut Kangisissuani aammalu Kalaallit Nunaata kitaani.

Akissarsiassarlu angisooq ataaseq kommissionit tamarmiusut akornanni $ 2.500 dollarsinik aningaasartalik tunniunneqartarpoq. Taannalu Karl Kristian Krusep tassa akissarsiaraa. Tunniussineq Uummannap Borgmesteriata allaffiani ullumi nal. 13.00 pivoq.

Taamaalilluni checkinnattaani aningaaserivimmut koruuninngortikkuniuk, Karl Kristian Krusep 13.675 koruunit kaasarfimmiorisinnaalissavai.

Akissarsisinneqarsimapput NASCO-p ukiumoortumik ataatsimiittarnerini nalunaarutigineqartarput ukiorlu manna ataatsimiinneq Bar Harbor-imi Maine-mi USA-miittumi pivoq. Aalisartut nunanit tamaneersut 1.200-t kapisillinnut nalunaaqutanik NASCO-mut nassiussisimapput.

Kapisilinniarneq nunatsinni suli ingerlavoq, taamaattumik nalunaaqutalimmik nassaariaruit, nalunaaqutannguaq Pinngortitaleriffimmut nassiunniariuk, imaassinnaavoq iluanaartutit.