Niaqornaarsuup nanui toquppaat
Nanoq arnaviaq piaraalu Niaqornaarsuup eqqaani sapaammi takuneqaqqaarput. Taakku ullumi ullaap tungaa Kangaatsiap illoqarfiata silatinnguanut pipput allaasinillu silaannarmut eqqarnikkut qimaatinniaraluarnerat iluatsinngilaq.
- Piaraa arnaminut qimaaqataanissamut mikivallaarami aammalu arnaata piaqqani qimakkumanagu, Piniarnermut aalisarnermut naalakkersuisoqarfimmi AC fuldmægtig Peter Løvstrøm KNR-mut nassuiaavoq.
Nannut nalunaaqutaq 12.45-up missaani toqunneqarput maannalu neqaat inunnut ulorianarsinnaasumik trikineqarnersoq misissorneqarpoq.
- Neqi ajoquteqanngippat kommunip suliffeqarfiinut agguaanneqassaaq, kisianni amia, kigutai erlaviilu Namminersorlutik Oqartussanut misissugassatut nassiunneqassapput, Peter Løvstrøm oqarpoq.