Niaqornaarsummi ilinniartitsisut illutaassapput

Kangaatsiap kommuniani nunaqarfimmi, Niaqornaarsummi, ilinniartitsut, ineqarnikkut piffissami sivitsortumi atugarlioraluttuinnaramik, Kangaatsiap kommunianut saaffiginnittarsimagaluarput, maannamut kinguneqanngitsunik. Akineqartannginnertik naammagiunnaarlugu ilinniartitsisut kommunimut maanna naammagittaalliuuteqarsimapput.

Ilinniartitsisut naammagittaalliutaat tusarneqartoq, Kangaatsiap borgmesteria Otto Jerimiassen oqarpoq. Kisianni ilinniartitsisut qaqugumita illutaassappat? Otto Jerimiassen ima akivoq:

-Ilumoorpoq Niaqornaarsummiit naammangittaalliuummik tigusaqarsimagatta, uanilu INI-p ataani sullinneqarnerput inissisimatillugu oqaatigiuminaappoq, aamma eqqaamasaqarfiginngilara ilinniartitsisut illussaannik sanaartornissamut innersuussaqartoqarsimanersoq. Tassa kommuni ukioq kingulleq aningaasatigut suliaqarnermini sanaartugassanut aningaasaliissuteqarsimavoq illunut qulinut, taakkunanngalu tallimat Niaqornaarsummi napparneqartussaapput.

Niaqornaarsummi illuliassat tallimat suliariumannittussarsiorneqareerput, atortussat inniminnerneqareerput, napparneqarfissaannullu anngunneqareersimallutik. Taamaattorli suli nappaasoqanngilaq, ukioq silap allanngorarnerata kingunerisaanik aputeqarpallaarsimammat Niaqornaarsummi illussat suli napparneqarsinnaasimanngillat, piffissamilu qanittumi sanaartorneq aallartikkumaartoq Otto Jerimiassen oqarpoq. Niaqornaarsummi illussat ukiaro oktobari qimappallaartinnagu naammassereerneqarsimanissaat kommunimit naatsorsuutigineqarpoq.

Kangaatsiap nunaqarfittaani allani ilinniartitsisut ineqarnikkut ajornartorsiuteqanngitsut Kangaatsiap kommunianit erseqqissaatigineqarpoq.