Qulaarpaa NGO: Pisassiissutit naalakkersuinikkut akuliuffigineqassanngillat
Politikerit aalisakkanik suliffissuaqarnermut qanippallaarput, taakkuuppummi pisassiissutinik agguaasartuusut. Pinngortitaq pillugu nunarsuaq tamakkerlugu suliniaqatigiiffiup WWF-ip Nuummi sulisua taama isumaqarpoq.
- Tamannami takusinnaalluarparput; politikerit pisassiissutinik qaffaanissaminnut tatineqartarput. Juullip nalaani tamanna arlaleriarluta takuarput, qaleralittassiissutit qaffaavigineqariasaarput, Kaare Winther Hansen taama oqarpoq.
Politikerit aalisarnerup iluani soqutigisaqartarnerat imaluunniit allatigut aalisarnerup iluani attuumassuteqarnerat aamma tikkuarpaa.
- Allaannginnami politikerit qanippallaartut, taamaattumillu aalajangiinernik ilungersunartunik ilaatigut nuannarineqanngitsunik aalajangiinissaminnut sapiissuseqaratik, Kaare Winther Hansen taama oqarpoq.
Avannaani pisimasoq assersuutissaalluartoq
Ilulissat, Uummannap Upernaviullu pigisaanni aalisarfiit killilersugaanngitsumik aalisarfigineqarsinnaasut WWF-ip GE aamma KNAPK assingalugit akerlerai.
Killilersugaanngitsumik aalisarfinnik eqqussisoqarneranut tunngatillugu suliap ingerlanneqarsimanera Winther Hansenip isornartorsiorpaa suliffissuaqarnermullu qanippallaalertoqarsinnaaneranut assersuutissaalluarnerarlugu.
Aamma atuaruk Killilersugaanngitsumik aalisarneq suli isorineqartoq
Aamma atuaruk Killilersugaanngitsumik qaleralinniartitsineq pitsaaquteqarlunilu sanngeequteqartoq
Tamatumunnga peqatigitillugu Winther Hansenip killilersugaanngitsumik aalisarfiit nalinginnaq inissinneqarsimanerarpai qaleraliillu qanoq agguataarsimanerannut sumilu qaleralinnik pisassiisoqarnissaanik pisariaqartitsisoqarneranut attuumassuteqarpallaarsorinagu.
- Taamaammat killilersugaanngitsumik aalisarfiit ajornartorsiutitaqarfiulluinnartutut isigaakka, sumiiffiimmi aalajangersimasut sumiiffinnut allanut eqqumiitsupilussuarmik iluaqutissartalersorneqarmata.
Arlaannaanulluunniit attuumanngitsumik isumalioqatigiissitaliortoqarli
Pisassiissutit suliamut ilisimasallit naliliinerat tunngavigalugu amerlassusileqartarnissaat nuannarineqalernissamullu atorneqannginnissaat qulakkeerniarlugu, Nunavummi suleriaaserineqartut Nunatsinnit isumassarsiorfigineqarnissaat Kaare Winther Hansenip kaammattuutigaa.
Nunavummi isumalioqatigiissitaliaqarpoq pissuussutit uumassusillit pillugit aalajangiisartunik, taakkulu naalakkersuinikkut toqqaannartumik sunniuteqarfigineqanngillat.
Aamma atuaruk Aalisarpallaarneq sivikitsuinnarmik iluanaarutaassaaq
- Aalajangiinerit politikerinut qanippallaarunnaarsinnissaat isumaliutigisariaqarparput, nunamimi maani innuttaasut taama ikitsigitillugit politikerit aalisakkanik suliffissuaqarnermut inuttut niuernikkullu qanippallaalersinnaasarmata, Winther Hansen taama oqarpoq.
