Assi: New Zealand Government

New Zealandimiut erfalasortaassartik pillugu taasisussanngortut

New Zealandimiut sivisuumik oqallisereerlutik, kingornalu taasitinneqareerlutik, erfalasussarilersinnaasartik nutaaq kiisami toqqarpaat.

Erfalasoq nutaaq tungujortumik qernertumillu tunuliaqutaqassaaq, uiffallu siilvitut qalipaatilik, ullorissallu aappaluttut sisamat, maanna erfalasumut ukiut hunnorujut sinnerlugit atuussimasup taarsissavai.

Erfalasussarli maanna erfalasumut ilumut taarserneqassanersoq New Zealandimi innuttaasut aappaagu marsimi taasissutigissavaat:

- Taasititsinissaq oqaluttuarisaanitsinnut pingaaruteqassaaq, New Zealandip ministeriunermut tullersortaa Bill English aviisimut New Zealand Heraldimut oqarpoq.

Tuluit erfalasuat Union Jack New Zealandip maanna erfalasuani ilaavoq, tuluillu nunasiaatigisimasaasa erfalasuannut, soorlu Australimiut erfalasuannut ilaatigut assinguallaartinneqartarluni.

Aamma atuaruk New Zealandip nutaamik erfalasortaarnissaa pillugu taasisitsisoqassaaq

Uiffak New Zealandimut pingaaruteqarpoq, assersuutigalugu New Zealandip rugbymi nunanut allanut unammisartuisa, All Blacksimik taaguutillit, uiffak ilisarnaatimittut ilaatigut aamma atortarpaat. Rugby-rtartut New Zealandimiunit nuannarineqartorujussuupput, nunarsuarmilumi aamma pissartaallutik.

Ullorissat sisamat taakku ullorissat Sydkorsimik taaguutilimmiittuneersuupput, nunarsuup affaa kujallermi taamaallaat takuneqarsinnaallutik.

New Zealand nutaamik erfalasoqalissanersoq innuttaasut marsimi taasitinneqarneranni paasinarsiumaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat